: ब्रिक्स देशका विदेशमन्त्रीहरूको बैठकमा सहभागी हुन भारत आइपुगेका रूसी विदेशमन्त्री सर्गेई लाभरोभले भारत र रुसबीचको सम्बन्ध अटुट रहेको बताएका छन् । दुई देशबीचको दूरी बढ्नु असम्भव रहेको र यसको कल्पना समेत गर्न नसकिने उनको भनाइ छ ।
पत्रकारहरूसँगको कुराकानीमा विदेशमन्त्री लाभरोभले भारत र रुसको सम्बन्धलाई कुनै एउटा शब्दमा मात्र सीमित गर्न कठिन हुने उल्लेख गरे । यदि यी दुई देश अलग भएमा विश्वलाई के नोक्सान हुन्छ र सँगै रहँदा के फाइदा हुन्छ भन्ने प्रश्नको जवाफ दिँदै उनले भने, 'यो सम्बन्धको व्याख्या एक वाक्यमा हुन सक्दैन । मानिसको भाषामा शब्दको अभाव भएर यसो भनिएको होइन, तर यति बलियो सम्बन्धका बारेमा विग्रहको कल्पना गर्नु नै कठिन कार्य हो ।'
लाभरोभले 'हिन्दी-रूसी भाई-भाई' भन्ने नारा केवल एउटा रमाइलो नारा मात्र नभएर यो रूसी र भारतीय संस्कृतिको अभिन्न अङ्ग बनेको बताए । रुसमा राज कपूरका फिल्मदेखि हालका भारतीय चलचित्र र वेब सिरिजहरू समेत निकै लोकप्रिय रहेको उनले जानकारी दिए ।
आर्थिक मोर्चाका बारेमा बोल्दै रूसी विदेशमन्त्रीले ऊर्जा, आणविक ऊर्जा र रक्षा क्षेत्रमा दुई देशबीचको साझा उत्पादन र सहयोग निरन्तर बढिरहेको बताए। उनले दुई देशबीच सांस्कृतिक आदानप्रदान जारी रहेको र सर्वसाधारणको आवतजावतमा समेत वृद्धि भएको उल्लेख गरे ।
