— पढाइलाई उमेरले छेक्दैन भन्ने उखानलाई प्रमाणित गर्दै ४० वर्षको उमेरमा एसईई परीक्षा दिएका सल्यानको दार्मा गाउँपालिका–५ का वडाध्यक्ष सुदीप केसी ३.२० जीपीए ल्याएर उत्तीर्ण भएका छन् । केसीले दार्माकोटस्थित नेपाल राष्ट्रिय मावि परीक्षा केन्द्रबाट गत चैतमा एसईई परीक्षा दिएका थिए ।
घरमै बसेर पढी ३.२० जीपीए ल्याएर उत्तीर्ण भएपछि आफ्नो पढ्ने चाहना पूरा हुने भन्दै वडाध्यक्ष खुसी भएका छन् । उनले जिल्लामै बसेर ११/१२ पढ्ने तयारी गरिसकेका छन् । केसी २०७४ मा वडा सदस्य हुँदै २०७९ मा वडाध्यक्ष भएका थिए । २०६२ सालमा कक्षा १० मा पढ्दै गर्दा टेस्ट परीक्षा दिएलगत्तै स्थानीय युवाको लहैलहैमा लागेर कमाइ गर्न भारतका विभिन्न स्थानमा गएको र पारिवारिक जिम्मेवारीले विभिन्न किसिमका काममा भुल्दा एसएलसी परीक्षा दिन नपाएको उनले बताए । पढाइ छुटेको २० वर्षपछि अहिले उनले एसईई परीक्षा दिएका थिए ।
उनी भन्छन्, ‘त्यतिबेला पढ्नेतर्फ युवाले खासै रुचि राख्दैनथे । १४ वर्ष पुगेपछि प्रायः सबै कमाउनका लागि भारतका विभिन्न ठाउँमा जान्थे । टेस्ट परीक्षा दिएर म पनि साथीसँग लागेर भारतको पौडी गडवाल गएँ । त्यहाँ चार वर्ष काम गरेर २०६६ मा घर फर्किएँ ।'
घरमा त्यत्तिकै बस्नु भन्दा केही गर्नुपर्छ भने मनसायले लगत्तै वैदेशिक रोजगारीका लागि मलेसिया गए । त्यहाँ चार वर्ष बिताए । मलेसियाबाट कमाइ ल्याएको रकमले जेसीवी किनेर चलाए । पैसा कसरी कमाउने भन्ने सोचमै विभिन्न काममा अल्मलिए । 'पढ्नु पर्छ भन्नेतर्फ ध्यानै गएन,' उनले भने ।
संघीयतापश्चात् राजनीतिमा प्रवेश गरेर २०७४ मा वडा सदस्य भए । २०७९ मा वडाध्यक्षमा निर्वाचित भए । वडा कार्यालयमा काम गर्दै जाने क्रममा र विभिन्न ठूला ब्यक्तिसँग भेटघाट बढ्दै गएपछि पढ्नु पर्छ, पढाइजत्तिको अरू केही छैन, राजनीति गर्नलाई पढाइ अति आवश्यक छ भन्ने चेत आयो । 'वडाकै विद्यालयमा कक्षा १० मा भर्ना भई एसईई परीक्षा दिएँ । आफ्नो लगन र मिहिनेतले पहिलो पटकमै सफल भएँ,’ उनले भने ।
एसईई परीक्षामा राम्रै अंक ल्याएर उत्तीर्ण भएपछि हौसिएका वडाध्यक्ष केसीले आफ्नो काम प्रभावित नहुने गरी पढाइलाई निरन्तरता दिदै प्लस टू भर्ना हुने तयारी गरेको जानकारी गराए । ‘वडाध्यक्ष भइरहेकाले बाहिर जान गाह्रो हुन्छ । वडाबासीको काममा खटिनु पर्छ । त्यही भएर आफ्नै पालिकामा रहेको विद्यालयमा प्लस टूमा भर्ना हुन्छु,’ उनले भने, ‘पढाइजत्तिको ठूलो केही छैन । पछिल्लो समयमा पढाइबिनाको राजनीति काम छैन । त्यसैले पढ्न आवश्यक देखेको छु ।’
