— नेपाल प्रहरीका प्रहरी महानिरीक्षक दानबहादुर कार्कीले नेपाल प्रहरीलाई नागरिकको भरोसाको संस्थाका रूपमा अझ मजबुत बनाउने बताएका छन् । प्रहरी संगठनलाई समयानुकूल, प्रविधिमैत्री र नागरिकप्रति उत्तरदायी बनाउने अभियान जारी रहेको उनले उल्लेख गरे ।
जिल्ला प्रहरी कार्यालय पर्सामा बुधबार आयोजित महिला बालबालिका तथा जेष्ठ नागरिक सेवा केन्द्र समुद्घाटन समारोहलाई सम्बोधन गर्दै महानिरीक्षक कार्कीले शान्ति सुरक्षा कायम गर्नु मात्रै नभई नागरिकलाई सहज, छिटो र प्रभावकारी सेवा दिनु नेपाल प्रहरीको मुख्य दायित्व भएको बताए । उनले प्रहरी र समुदायबीचको सम्बन्ध बलियो भए मात्रै अपराध नियन्त्रण तथा सामाजिक शान्ति कायम गर्न सहज हुने धारणा राखे ।
‘प्रहरी जनताको सेवक हो । जनताको अपेक्षा अनुसार काम गर्नु हाम्रो कर्तव्य हो,’ उनले भने, ‘नागरिकले प्रहरी कार्यालय पुग्दा डर होइन, भरोसा महसुस गर्नुपर्छ । त्यसका लागि संगठनभित्र सुधार र सेवामा पारदर्शिता आवश्यक छ ।’
कार्कीले पछिल्लो समय नेपाल प्रहरीले प्रविधिको प्रयोग बढाउँदै सेवा प्रवाहलाई आधुनिक बनाउने प्रयास गरिरहेको जानकारी दिए । उनले डिजिटल प्रणालीमार्फत उजुरी दर्ता, अनुसन्धान र तथ्यांक व्यवस्थापनलाई व्यवस्थित बनाइँदै गएको बताए ।
साइबर अपराध, लागूऔषध कारोबार, संगठित अपराध तथा सीमावर्ती क्षेत्रमा हुने अवैध गतिविधि नियन्त्रण अहिले प्रहरीका प्रमुख चुनौतीका रूपमा रहेका बताउँदै उनले यस्ता गतिविधिविरुद्ध नेपाल प्रहरीले विशेष अभियान सन्चालन गरिरहेको बताए । ‘अपराधको स्वरूप बदलिएको छ, त्यसैले अनुसन्धानको शैली पनि आधुनिक हुनुपर्छ,’ उनले भने, ‘प्रविधिको प्रयोगबिना अहिलेको अपराध नियन्त्रण सम्भव छैन ।’
महानिरीक्षक कार्कीले ट्राफिक व्यवस्थापन, महिला तथा बालबालिकामाथि हुने हिंसा नियन्त्रण र समुदाय–प्रहरी साझेदारी कार्यक्रमलाई प्राथमिकतामा राखिएको बताए । विद्यालय, समुदाय र स्थानीय तहसँग समन्वय गरेर सचेतनामूलक कार्यक्रम सन्चालन गरिरहेको उनको भनाइ थियो । प्रहरी संगठनभित्र अनुशासन र आचरणलाई थप कडाइका साथ लागू गरिने उनले स्पष्ट पारे ।‘नेपाल प्रहरीप्रति जनताको विश्वास बढाउनु अहिलेको मुख्य लक्ष्य हो,’ उनले भने, ‘सेवामा ढिलासुस्ती, गैरजिम्मेवारी र अनुशासनहीनता स्वीकार्य हुँदैन ।’
कार्कीले युवा पुस्तालाई लागुऔषध दुर्व्यसनबाट जोगाउन परिवार, विद्यालय र समाज सबै सचेत हुनुपर्ने बताए । लागूऔषध नियन्त्रणका लागि नेपाल प्रहरीले विद्यालय तथा समुदाय केन्द्रित अभियान सन्चालन गरिरहेको जानकारी पनि उनले दिए । उनले नागरिकको सुझाव र गुनासोलाई प्रहरीले गम्भीर रूपमा लिने उल्लेख गर्दै सेवा सुधारलाई निरन्तर अघि बढाइने प्रतिबद्धता जनाए ।
महानिरीक्षक कार्कीले संयुक्त राष्ट्रसंघीय परियोजना सेवा कार्यालय (युनोप्स)को २ करोड ४८ लाख ६६ हजार १ सय ८७ रुपैयाँको लागतमा निर्माण गरिएको महिला, बालबालिका तथा जेष्ठ नागरिक भवनको बुधबार रिबन काटेर समुद्घाटन गरेका हुन् । युनोप्सका अपरेसन को-अर्डिनेटर इन्द्र न्यौपाने र इन्फ्रास्टक्चर म्यानेजर शिशिर उपाध्यायले युनोप्सले नेपालमा ३८ जिल्लामा प्रहरी कार्यालयमा यस्ता ५८ भवन निर्माण गरेर नेपाल प्रहरीलाई हस्तान्तरण गरिसकेको जानकारी दिए ।
