— राष्ट्रिय खेलकुद परिषद्का निवर्तमान सदस्य–सचिव टंकलाल घिसिङले एसिया रग्बी फिप्टिन्स इमिरेट्स महिला च्याम्पियनसिपको उपाधि विजेता जापानलाई पुरस्कृत गरेका छन् ।
एसिया रग्बीका उपाध्यक्ष समेत रहेका घिसिङ अतिथिका रूपमा कार्यक्रममा सहभागी भएका थिए ।
काजकिस्तानको अल्माटीमा जारी प्रतियोगितामा एसियाका शीर्ष तीन वरीयतामा रहेका राष्ट्र जापान, हङकङ चाइना र काजकिस्तानले प्रतिस्पर्धा गरेका थिए । सिंगल राउन्ड रोबिनका आधारमा भएको प्रतियोगितामा जापानले पहिलो खेलमा काजकिस्तान र दोस्रोमा हङकङ चाइनालाई पराजित गर्दै उपाधि जितेको हो । लिगको अन्तिम खेल काजकिस्तान र हङकङबीच १० मेमा हुनेछ ।
‘अल्माटीमा आयोजित एसिया रग्बीमा पुरस्कार वितरण गर्न पाउँदा सम्मानित भएको महसुस गरेको छु । जापानलाई जितका लागि बधाई छ । जापानको टिमवर्क र जोशले साँच्चै एसियाली रग्बीमा उत्कृष्टताको मानक तय गरेको छ,‘ पुरस्कार वितरणपछि घिसिङले फेसबुकमा लेखेका छन् । यस च्याम्पियनसिपले एसियाभरि महिला रग्बीको स्थिर प्रगति र बढ्दो स्तरलाई प्रतिबिम्बित गर्नुका साथै सबै तहमा खेललाई विकास गर्न उनले साझा प्रतिबद्धता व्यक्त गरेका छन् ।
