: ट्राफिक प्रहरीले पछिल्लो २४ घण्टामा काठमाडौं उपत्यकामा ट्राफिक नियम उल्लंघन गर्ने २ हजार २९३ सवारी चालकलाई कारबाही गरेको छ।
मंगलबार बिहानसम्म गरिएको कारबाहीमा मादक पदार्थ सेवन (मापसे) गरी सवारी चलाउने ११३ जना, राइड सेयरिङ नियम उल्लंघन गर्ने १८४, रातोबत्ती उल्लंघन गर्ने १५७, तीव्र गतिमा सवारी चलाउने १२४, लेन क्रस गर्ने २१९, सडक तथा फुटपाथ अतिक्रमण गर्ने १२३, हर्न निषेध उल्लंघन गर्ने ७३, एकतर्फी सवारी चलाउने १०५ र अन्य कसुरमा १ हजार १९५ जना चालक परेका छन्।
ट्राफिक प्रहरीका अनुसार विभिन्न स्थानमा गरिएको नियमित निगरानी तथा चेकजाँचका क्रममा उनीहरूलाई कारबाही गरिएको हो।
उक्त अवधिमा गरिएको कारबाहीबाट कुल २४ लाख २६ हजार १ रुपैयाँ राजस्व संकलन भएको प्रहरीले जनाएको छ। प्रहरीले मादक पदार्थ सेवन गरी सवारी चलाउनु कानुनविपरीत तथा दण्डनीय कार्य भएको उल्लेख गर्दै यस्ता गतिविधि देखिएमा नजिकको प्रहरी कार्यालय,ट्राफिक कन्ट्रोल रूम (१०३) वा प्रहरी हटलाइन (१००) मा तुरुन्त जानकारी गराउन सर्वसाधारणलाई आग्रह गरेको छ।
