: अमेरिकी संसदमा राष्ट्रपति डोनाल्ड ट्रम्पको मानसिक स्वास्थ्यलाई लिएर सत्तापक्ष र प्रतिपक्षबीच तीव्र विवाद उत्पन्न भएको छ। हाउस आर्म्ड सर्भिस कमिटीको सुनुवाइका क्रममा डेमोक्र्याट सांसद सारा ज्याकब्सले रक्षामन्त्री पिट हेग्सेथसँग राष्ट्रपति ट्रम्पको कार्यक्षमतामाथि प्रश्न उठाएपछि स्थिति तनावपूर्ण बनेको बीबीसीमा उल्लेख छ ।
सांसद ज्याकब्सले ट्रम्पले आफ्नो सामाजिक सञ्जाल 'ट्रुथ सोसल'मा गरेका पछिल्ला पोस्टहरूलाई उदाहरणका रूपमा प्रस्तुत गर्दै उनको भाषाको कडा आलोचना गरेकी थिइन्। ज्याकब्सको पछाडि उभिएका एक सहायकले ट्रम्पका पुराना विवादास्पद पोस्टका कटआउटहरू समेत प्रदर्शन गरेका थिए। ती प्रदर्शन गरिएका सामग्रीहरूमा एआईद्वारा निर्मित ट्रम्पको एक तस्बिर पनि थियो, जसमा उनलाई 'येशू' जस्तो स्वरूपमा देखाइएको थियो।
बहसका क्रममा सांसद ज्याकब्सले सिधै प्रश्न गरिन्, 'के तपाईं विश्वास गर्नुहुन्छ कि राष्ट्रपति (ट्रम्प) कमान्डर-इन-चीफको भूमिका निभाउनका लागि मानसिक रूपमा पर्याप्त स्थिर हुनुहुन्छर ?'
रक्षामन्त्री हेग्सेथले उक्त प्रश्नको प्रतिवाद गर्दै उल्टै प्रश्न गरे, 'के तपाईंले यही प्रश्न चार वर्षसम्म जो बाइडनलाई सोध्नुभएको थियो '?
हेग्सेथले अगाडि भने, 'तपाईंले त्यसो गर्नुभएन। म कमान्डर-इन-चीफको बारेमा तपाईंले गरिरहनुभएको यस स्तरको टिप्पणीमा संलग्न हुन चाहन्न। के तपाईंले यो प्रश्न तब सोध्नुभयो जब तपाईं र तपाईंका डेमोक्र्याट साथीहरूले जो बाइडनको बचाउ गरिरहनुभएको थियो, जो स्पष्टसँग बोल्न समेत सकिरहनुभएको थिएन ?
हेग्सेथको प्रहारपछि ज्याकब्सले तत्कालै जवाफ फर्काउँदै सन् २०२४ को चुनावमा बाइडन आफ्नो पार्टीको राष्ट्रपतिको उम्मेदवार नरहेको स्पष्ट पारेकी थिइन्।
