: नवलपरासीको बर्दघाटस्थित एक रेष्टुरेन्टबाट झन्डै १३ लाख बढी पर्ने लागुऔषध बरामद भएको छ। लागुऔषधको कारोबार हुँदै छ भन्ने सूचना पाएर गएको लागुऔषध नियन्त्रण ब्युरो शाखा कार्यालय भैरहवाको टोलीले इलाका प्रहरी कार्यालय बर्दघाटको सहयोगमा उक्त लागुऔषध बरामद गरेको हो।
उक्त लागुऔषध प्रयोगशालामा रासायनिक रुपमा तयार पारिने खालको रहेको लागुऔषध नियन्त्रण ब्युरोका एक प्रहरीले जनाएका छन्। चार वटा प्याकेटमा राखिएको उक्त लागुऔषधको परिणाम २ सय ८ ग्राम १६० मिलिग्राम रहेको छ । उक्त लागुऔषध बजारमा ५ देखि ६ हजार प्रति ग्राममा बिक्री हुने गरेको ति प्रहरीले जनाएका छन्।
बर्दघाट नगरपालिका-१० लण्डनब्रिज नजिक रहेको संगम रुफटप रेष्टुरेन्ट एण्ड खाजा घरबाट लागुऔषध बरामद भएको जिल्ला प्रहरी कार्यालयका सूचना अधिकारी डिएसपी बीरदत्त पन्तले जानकारी दिए। रेष्टुरेन्टमा बसेर ग्राहकको पर्खाइमा बसिरहेका बर्दघाट नगरपालिका-१० लण्डन ब्रिजका ६१ वर्षीय धनलाल चापागाई र सुस्ता गाउँपालिका-५ थारुटोलाका ३३ वर्षिय स्तकार हुसेनको साथबाट उक्त लागुऔषध बरामद भएको हो। पक्राउ परेका उनीहरूलाई लागुऔषध सम्बन्धीको कसुरमा मुद्दा प्रकृया अघि बढाइएको प्रहरीले जनाएको छ।
