: नवलपुरको कोल्हुवास्थित राइनो रंगशालामा जारी राइनो संरक्षण गोल्डकप फुटबल प्रतियोगितामा संकटा फुटबल क्लब काठमाडौं सेमिफाइनलमा प्रवेश गरेको छ।
बिहीबार भएको दोस्रो क्वार्टरफाइनल खेलमा मध्यबिन्दु स्काई लाइन योङ स्टार कावासोतीसँग १-० को कठिन जित निकाल्दै संकटाले अन्तिम चारको यात्रा तय गरेको हो। अत्यन्तै प्रतिस्पर्धात्मक बनेको उक्त खेलको पहिलो हाफ गोलरहित बराबरीमा सकिएको थियो। दुवै टोलीले केही सुनौला अवसर प्राप्त गरे पनि गोलमा परिणत गर्न सकेनन्।
तर, दोस्रो हाफमा संकटाले आक्रामक खेल पस्कियो। खेलको निर्णायक गोल संकटाका जर्सी नम्बर १२ का श्यामबाबु मगरले गरे। खेलमा उत्कृष्ट प्रदर्शन गरेका संकटाका रोशन पहाडी म्यान अफ द म्याच घोषित भए।
प्रतियोगिता अन्तर्गत शुक्रबारको क्वार्टरफाइनल खेलमा चित्लाङ फुटबल क्लब र सशस्त्र प्रहरी बलबीच प्रतिस्पर्धा हुने आयोजकले जनाएको छ। गैंडा संरक्षणको सन्देशसहित आयोजित यस प्रतियोगिताको विजेताले नगद ८ लाख र उपविजेताले ४ लाख रुपैयाँसहित ट्रफी र मेडल प्राप्त गर्नेछन्।
