: इरानको इस्फ़हानमा बस्ने २१ वर्षीय युवक सासन आजादवर जोन्गानीलाई फाँसी दिइएको छ। उनलाई यसै वर्षको जनवरीमा सरकार विरोधी प्रदर्शनका क्रममा पक्राउ गरिएको थियो। आजादवरलाई इस्फ़हानको दस्तगर्द जेलमा फाँसी दिइएको बीबीसीमा उल्लेख गरिएको छ ।
उनको परिवारका एक निकट स्रोतले मानवअधिकार वेबसाइटलाई जानकारी दिएअनुसार, आजादवरको अन्तिम संस्कार बिहीबार दिउँसो एक सुरक्षित क्षेत्रमा गरिएकाे छ। उक्त प्रक्रियामा उनका केवल १० जना आफन्त लाई मात्र सहभागी हुने अनुमति दिइएको थियो।
इरानको इस्लामिक गणतन्त्रको न्यायपालिकाका अनुसार जनवरीमा सरकारलाई फाल्ने उद्देश्यले भएका प्रदर्शनका क्रममा आजादवरले अधिकारीहरू बोकेको मिनीबसमा ढुङ्गा र लाठीले आक्रमण गरेका थिए।
उनले सवारी साधनका सिसा फुटाएको र अधिकारीहरूमाथि इँटा प्रहार गरेको आरोप लगाइएको छ। न्यायपालिकाले दाबी गरेअनुसार, उनले प्रदर्शनमा जानुअघि शासन व्यवस्था ढाल्ने उद्देश्यले सडकमा उत्रिन लागेको स्वीकार गरेका थिए र आफ्ना साथीहरूलाई पनि सहभागी हुन अपिल गरेका थिए।
मानवअधिकार कार्यकर्ताहरूले आजादवरलाई हिरासतमा राखिएको अवस्था, वकिलसम्मको पहुँच, र कुन परिस्थितिमा उनको बयान लिइएको हो भन्नेबारे कुनै स्पष्ट जानकारी नभएको बताएका छन्। इरानमा यस्ता बयानहरू प्रायः दबाब वा यातना दिएर लिइने गरिएको भन्दै अन्तर्राष्ट्रिय स्तरमा आलोचना हुने गरेको छ।
