: इजरायल र हिजबुल्लाहले एक अर्कामाथि युद्धविराम उल्लंघन गरेको आरोप लगाएका छन् । यसअघि इजरायल डिफेन्स फोर्स (आईडीएफ) ले लेबनानबाट प्रहार गरिएका धेरै प्रोजेक्टाइलहरू अवरोध गरिएको जनाएको थियो । श्टुला क्षेत्रमा सायरन पनि बजेका थिए । उता हिज्बुल्लाहले टेलिग्राममार्फत् श्टुला क्षेत्रमा लक्षित गर्दै रकेट आक्रमण गरेको दाबी गरेको छ ।
आईडीएफले एक्स (ट्विटर) मा जारी गरेको वक्तव्यमा तीन जनालाई मारिएको जनाएको छ, जसलाई उसले ‘हिज्बुल्लाहका लडाकु’ भनेको छ । आईडीएफका अनुसार ती व्यक्तिहरूले इजरायली वायुसेनाको विमानमाथि मिसाइल प्रहार गर्ने असफल प्रयास गरेका थिए । आईडीएफले दुई फरक घटनामा दक्षिणी लेबनानमा तैनाथ आफ्ना सैनिकहरूमाथि हिज्बुल्लाहले रकेट प्रहार गरेको पनि बताएको छ ।
उसले भन्यो, ‘यी कार्यहरू युद्धविराम सम्झौताको खुला उल्लंघन हुन् ।’ बिहीबार साँझ हिज्बुल्लाहले उत्तरी इजरायलमा रकेट प्रहार गरेको बताएको थियो। उसले यसलाई इजरायलबाट भएको ‘युद्धविराम उल्लंघन’ को जवाफ भएको दाबी गरेको छ । लेबनानको सरकारी नेशनल न्युज एजेन्सीका अनुसार, इजरायलले आज बिहान दक्षिणी लेबनानको टायर सहरमा आक्रमण गरेको छ ।
