: अदालतबाट दोषी ठहर भई सवारी ज्यानसम्बन्धी कसुरमा फरार रहेका एक जना अभियुक्त पक्राउ परेका छन् । उनलाई कैद सजायका लागि कारागार चलान गरिएको छ । सवारी ज्यानसम्बन्धी कसुरमा फरार रहेका प्रतिवादी नुवाकोटको तारकेश्वर गाउँपालिका–४ का ३६ वर्षीय कुमार अछामीलाई मंगलवार पक्राउ गरिएको जिल्ला प्रहरी कार्यालय नुवाकोटले जनाएको छ । प्रहरीका अनुसार सवारी ज्यानसम्बन्धी कसुरमा अछामीले दुई वर्ष ६ महिना २६ दिन कैद सजाय भुक्तान गर्न बाँकी रहेको छ ।
पक्राउपछि युवकलाई नुवाकोट जिल्ला अदालतमा पेश गरिएकोमा उनको कैद सजाय भुक्तानका लागि केन्द्रीय कारागार नुवाकोट चलान गरिएको प्रहरी नायव उपरीक्षक विक्रम लामाले जानकारी दिए । उनका अनुसार अछामी उक्त मुद्दामा दोषी ठहर भएपछि लामो समयदेखि फरार रहेका थिए ।
फरार प्रतिवादी पक्राउसँगै मुद्दाको कार्यान्वयन प्रक्रिया अघि बढाइएको प्रहरीले जनाएको छ । नुवाकोटमा फरार अभियुक्त पक्राउ अभियान सञ्चालन भइरहेको जिल्ला प्रहरी कार्यालय नुवाकोटले जनाएको छ ।
यसैबीच, लागूऔषध ( खैरो हिरोइन) जस्तो देखिने पदार्थसहित नुवाकोटमा ५ जना युवक पक्राउ परेका छन् । नुवाकोटको लिखु गाउँपालिका ६ छहरे बजारमा स्थानीय होटेल रेष्टुरेन्टको कोठामा बसी रहेको अवस्थामा पक्राउ परेकाहरुको साथवाट लागूऔषध ( खैरो हिरोइन ) जस्तो देखिने पदार्थ बरामद भई पक्राउ परेका हुँदा अनुसन्धानका लागि लागूऔषधसम्बन्धी कसुरमा नुवाकोट जिल्ला अदालतबाट ९ दिन हिरासतमा राखेर अनुसन्धान गर्ने अनुमति लिइएको जिल्ला प्रहरी कार्यालय नुवाकोटले जनाएको छ ।
पक्राउ परेकाहरुमा रसुवाको उत्तरगया गाउँपालिका–४ का २४ वर्षीय सुवास वाइवा, सोही स्थानका २२ वर्षीय चित्रबहादुर तामाङ, रसुवाकै कालिका गापा–३ का २४ वर्षीय सुमन घर्तिमगर, नुवाकोटको किस्पाङ गापा–१ का २७ वर्षीय तुलसिङ तामाङ र बिदुर नपा .१० का सुमन तामाङ रहेको प्रहरी नायव उपरीक्षक विक्रम लामाले जानकारी दिए । उनका अनुसार लागूऔषध खैरो हिरोइन जस्तो देखिने पदार्थ ३ दमशलव ६८ ग्राम र डिजिटल तराजु एक थानसमेत वरामद गरिएको छ ।
