: सुनसरीमा गाँजा तस्करी नियन्त्रणमा चुनौती थपिँदै गएको छ । पछिल्लो घटनामा सशस्त्र प्रहरीले ठूलो परिमाणमा गाँजा बरामद गरे पनि तस्करहरू भने फरार हुन सफल भएका छन् ।
बुधबार बिहान करिब २ः४५ बजे सुनसरीको बर्जु गाउँपालिका–३ खरीटोलदेखि करिब ८०० मिटर दक्षिण सीमा क्षेत्रबाट भारततर्फ लैजाँदै गरिएको १६० किलो प्रतिबन्धित लागूऔषध गाँजा सशस्त्र प्रहरीले बरामद गरेको छ । सशस्त्र प्रहरी बल, नेपाल सीमा सुरक्षा गुल्म कप्तानगञ्जबाट सशस्त्र प्रहरी नायब उपरीक्षक नन्दकिशोर प्रसाद महतोको कमाण्डमा खटिएको ५ जना र बीओपी अमडुवाबाट सशस्त्र प्रहरी निरीक्षक दिलकुमार माझीको नेतृत्वमा खटिएको ५ जना गरी १० जनाको मोबाइल गस्ती टोलीले उक्त गाँजा नियन्त्रणमा लिएको छ ।
nullगस्ती टोलीलाई देख्ने बित्तिकै गाँजा बोकेर हिँडेका व्यक्तिहरू सामान छाडेर फरार भएका थिए । बरामद गरिएको गाँजा आवश्यक कारबाहीका लागि नेपाल प्रहरीलाई बुझाइएको सशस्त्र प्रहरी उपरीक्षक श्यामकुमार कार्कीले जानकारी दिए । पछिल्लो समय सुनसरीमा गाँजा तस्करीका घटनाहरू निरन्तर बढ्दै गएका छन् । विशेष गरी पहाडी जिल्ला धनकुटामा उत्पादन हुने गाँजा सजिलै तराईसम्म झर्ने र त्यहाँबाट भारततर्फ तस्करी हुने क्रम तीव्र बनेको छ । स्रोतका अनुसार धनकुटाबाट भेडेटार हुँदै धरान झारिएको गाँजा सुनसरीका विभिन्न नाकाबाट भारत पठाइने गरेको छ ।
प्रहरीका अनुसार उत्पादन क्षेत्रमा कडाइ नहुँदा तस्करहरूलाई सहज भएको छ । धनकुटामा गाँजा उत्पादन र ओसारपसारमा प्रभावकारी नियन्त्रण नहुँदा तस्करहरूले खुलेआम रूपमा कारोबार गरिरहेका छन् । यसको प्रत्यक्ष असर भने सुनसरी र मोरङमा देखिएको छ, जहाँ सशस्त्र र नेपाल प्रहरीले पटक–पटक गाँजा बरामद गरिरहेका छन् । प्रहरीका अनुसार सीमावर्ती क्षेत्रबाट भारततर्फ हुने अवैध ओसारपसार नियन्त्रण गर्नु चुनौतीपूर्ण बन्दै गएको छ ।
खुला सीमा, भौगोलिक अवस्थिति र संगठित तस्कर समूहको सक्रियताले यस्तो अपराध नियन्त्रणमा कठिनाइ थपिएको उनीहरूको भनाइ छ । सुनसरीमा सशस्त्र र नेपाल प्रहरीले तस्करी नियन्त्रणका लागि गस्ती बढाइएको र अन्य निकायसँग समन्वय गरी अभियान सञ्चालन गरिरहेको भए पनि उत्पादन क्षेत्रमै कडाइ नगरेसम्म समस्या समाधान नहुने बताइएको छ । धनकुटाका प्रमुख जिल्ला अधिकारी बिनोदकुमार खडकाले जिल्ला सुरक्षा समितिको बैठकमा गाजा उत्पादन र तस्करी नियन्त्रण गर्न प्रभावकारी कदम चाल्न जिल्लाका सबै प्रहरी युनिट र प्रहरी प्रमुखलाई निर्देशन दिएको बताए ।
