— राष्ट्रिय सभाका अध्यक्ष नारायणप्रसाद दाहाल र अस्ट्रेलियाको प्रतिनिधिसभाका सभामुख मिल्टन डिकबीच शिष्टाचार भेटवार्ता भएको छ ।
टर्कीको इस्तानबुलमा जारी अन्तर व्यवस्थापिका संघ (आइपीयू)को १५२ औं महासभामा सहभागी अध्यक्ष दाहाल र सभामुख मिल्टनबीच भेटवार्ता भएको हो । भेटमा नेपाल र अस्ट्रेलियाबीचको द्विपक्षीय सम्बन्ध, आपसी हित र संसदीय सहकार्यका विषयमा छलफल भएको राष्ट्रिय सभाका अध्यक्षको सचिवालयले जनाएको छ ।
अध्यक्ष दाहालले जेनेभामा भएको भेटको स्मरण गर्दै दुई देशका संसदबीचको सहकार्य, सहयोग र अनुभव आदानप्रदानका लागि थप कार्यक्रम बनाउनु पर्नेमा जोड दिए । अस्ट्रेलियाले नेपालको विकास र समृद्धिका लागि पुर्याउँदै आएको भन्दै अध्यक्ष दाहालले आगामी दिनमा अझ थप सहयोग र सहकार्यका लागि आग्रह गरे ।
नेपाल र अस्ट्रेलियाबीच सिधा हवाई सेवा सञ्चालन गर्न सके दुई देशबीचको सम्बन्ध विस्तारमा थप टेवा पुग्ने उनको भनाइ थियो ।
अस्ट्रेलियामा नेपाली समुदायको ठूलो उपस्थिति रहेको सन्दर्भ कोट्याउँदै अध्यक्ष दाहालले नेपाली समुदायको शिक्षा, रोजगारी र सुरक्षाका लागि संसद्को तर्फबाट सकारात्मक पहलकदमीका लागि आग्रह गरे ।
अस्ट्रेलियाको प्रतिनिधिसभाका सभामुख मिल्टन डिकले अस्ट्रेलिया र नेपालको सम्बन्ध विगतदेखि नै निकै सौहार्दपूर्ण रहेको चर्चा गर्दै संसदीय सहकार्यले दुई देशको सम्बन्ध अझ प्रगाढ र मजबुत बन्ने बताए ।
आफूले नेपाल भ्रमण गरेर फर्केपछि आफ्नो निर्वाचन क्षेत्रका ३ वटा सरकारी विद्यालयमा नेपाली भाषाको पाठ्यक्रम पनि समावेश गरेको उल्लेख गर्दै सभामुख मिल्टनले आगामी दिनमा त्यसलाई बढाएर लैजाने बताए ।
एसिया प्यासिफिक क्षेत्रबाट अहिलेसम्म आइपीयूको नेतृत्व नभएको र आगामी १५३ औँ महासभामा आफूले आइपीयूको अध्यक्षमा उम्मेदवारी दिने उल्लेख गर्दै सभामुख मिल्टनले उक्त निर्वाचनमा नेपालको पूर्ण सहयोग रहनेमा आफू विश्वस्त रहेको बताए ।
संसदीय मैत्री समूह गठन, आपसी भ्रमण, संसदीय अभ्यास आदानप्रदानजस्ता कार्यमा आफू सधैँ तत्पर रहेको उनले बताए । हवाई सेवा सिधा उडान, शैक्षिक छात्रवृत्ति वृद्धिलगायतका विषयमा आफूहरु सकारात्मक भएको सभामुख मिल्टनको भनाइ थियो।
आइपीयूको अध्यक्षको उम्मेदवारीका सन्दर्भमा अध्यक्ष दाहालले नेपालको तर्फबाट आगामी आइपीयूमा प्रतिनिधिसभाका सभामुखको सहभागिता रहने र आफूले आवश्यक समन्वय गर्ने उल्लेख गरे ।
भेटमा नेपाली संसदीय प्रतिनिधि मण्डलको तर्फबाट राष्ट्रियसभाका सदस्यहरु कृष्णबहादुर रोकाया र अञ्जान शाक्य, राष्ट्रियसभा सचिव तुलबहादुर कँडेल र शाखा अधिकृत सपना सापकोटाको उपस्थिति रहेको थियो ।
चीन र भुटानको संसदीय प्रतिनिधि मण्डलसँग भेट
यसैबीच आइपीयूको साइडलाइन मिटिङमा चिनियाँ राष्ट्रिय जनकङ्ग्रेसका सदस्य तथा शिक्षा, विज्ञान, संस्कृति र जनस्वास्थ्य समितिका उपाध्यक्ष नेतृत्वको संसदीय प्रतिनिधि मण्डल र भुटानको संसद् काउन्सिल अफ रिप्रेरिजेन्टेटिभका सभामुख नेतृत्वको टोलीसँग पनि शिष्टाचार भेटवार्ता भएको थियो ।
