: आईसीसी वुमेन्स च्यालेन्ज ट्रफी २०२६ मा नेपाल अमेरिकासँग ४४ रनले पराजित भएको छ। रावान्डा क्रिकेट स्टेडियममा टस हारेर पहिले ब्याटिङको निम्तो पाएको अमेरिकाले निर्धारित २० ओभरमा ६ विकेट गुमाउँदै १२३ रन बनाएको थियो।
अमेरिकाले दिएको १२४ रनको निर्धारित लक्ष्यमा नेपालले २० ओभरमा ९ विकेट गुमाउँदै ७९ रन मात्रै बनाउन सक्यो। नेपालका लागि ओपनर ब्याटर बिन्दु रावलले २७ रन बनाइन्। कविता जोशीले ११ रन बनाउँदा अन्य कुनै पनि ब्याटरले दोहोरो अंकमा रन बनाउन सकेनन्। जसको फलस्वरूप नेपाल सस्तैमा समेटियो।
अमेरिकाका लागि बलिङतर्फ माही माधवन, तारानुम चोपडाले २-२ विकेट लिए। कप्तान अदितिबा चुडासमा, ऋतु सिंह, लेखा सेट्टी र सैनावी कम्बालापल्लीले १-१ विकेट लिए।
त्यसअघि, ब्याटिङ गरेको अमेरिकाका लागि पुजा गणेशले सर्वाधिक ४७ रन बनाइन्। उनले ४९ बलमा ३ चौका प्रहार गरिन्। ओपनर ब्याटर चेतना रेड्डी प्यागीध्यालाले ३० र गार्गी भोगलेले ३४ रन बनाए।
नेपालका लागि बलिङतर्फ मनिषा उपाध्यायले २ विकेट लिइन्। कविता कुँवर र रिया शर्माले १-१ विकेट लिए। नेपालले जारी प्रतियोगिताको दोस्रो खेल आइतबार इटालीसँग खेल्नेछ।
