: अमेरिका र इरानबीच दुई हप्ताको युद्धविराम घोषणा भएपछि शान्ति वार्ताका लागि इरानको प्रतिनिधिमण्डल पाकिस्तान पुगेको छ ।इरानको सरकारी मिडियाले प्रतिनिधिमण्डल इस्लामाबाद पुगेको पुष्टि गरेको छ । उता अमेरिकाका उपराष्ट्रपति जेडी भान्स पनि इस्लामाबाद जाँदैछन्।
उनी शान्ति वार्तामा अमेरिकाको प्रतिनिधित्व गर्नेछन् । उनीसँग अमेरिकी राष्ट्रपति डोनाल्ड ट्रम्पका विशेष दूत स्टिभ विटकाफ र ट्रम्पका ज्वाइँ जारेड कुशनर पनि छन् ।
पछिल्ला केही हप्तादेखि पाकिस्तानले अमेरिका र इरानबीच मध्यस्थकर्ताको भूमिका खेल्दै आएको छ । पाकिस्तानको इरानसँग ऐतिहासिक सम्बन्ध छ र ट्रम्पका अनुसार पाकिस्तानी सेनाका प्रमुख आसिम मुनिर इरानलाई ‘धेरै मानिसभन्दा राम्रोसँग’ बुझ्छन् ।
डोनाल्ड ट्रम्पले अमेरिकालाई इरानबाट १० बुँदे प्रस्ताव प्राप्त भएको बताएका छन् । जसलाई उनले ‘वार्ताका लागि उपयुक्त आधार’ भनेका छन् ।इरानका विदेशमन्त्री अब्बा अराघचीले पनि १५ बुँदे प्रस्तावको उल्लेख गरेका छन् । ट्रम्पका मुख्य वार्ताकारहरूले यसले द्वन्द्व अन्त्य गर्न सक्ने बताएका छन् ।
जेडी भान्सले पत्रकारहरूसँग कुरा गर्दै ‘वार्ताको प्रतीक्षा गरिरहेका’ बताएका छन् । तर उनले इरानलाई चेतावनी पनि दिएका छन् । उनले भने, यदि इरानले ‘इमानदारीपूर्वक वार्ता गर्दैन’ वा ‘चाल चल्ने प्रयास गर्छ’ भने अमेरिकाबाट सकारात्मक प्रतिक्रिया आउने छैन । तर, लेबनानमाथि इजरायलका आक्रमणहरूले शान्ति वार्तामाथि निरन्तर शंका उत्पन्न गरिरहेका छन् ।
