: शिक्षा, विज्ञान तथा प्रविधि मन्त्रालयले जेनजी आन्दोलनकी घाइते एकता शाहलाई निःशुल्क एमबीबीएस अध्ययनको अवसर दिने विषय ऐन–नियम विपरीत नभएको स्पष्ट पारेको छ ।
सरकारले जेनजी आन्दोलनकी घाइते शाहीलाई निःशुल्क एमबीबीएस अध्ययनको अवसर उपलब्ध गराउने निर्णय गरेको छ । मन्त्रालयले शनिबार एक विज्ञप्ति जारी गर्दै मन्त्रिपरिषदको चैत १ गतेको उक्त निर्णयबारे ऐन नियम विपरीत नभएको प्रष्ट पारेको हो । मन्त्रालयले सरकारको यस निर्णयले प्रचलित कानुन बमोजिम अरु कसैले पाउने अवसरलाई संकुचन एवं बाधा समेत नपरेको जनाइएको छ ।
जेनजी आन्दोलनका क्रममा घाइते शाहीले चिकित्सा शिक्षा आयोगद्वारा लिइएको शैक्षिक वर्ष २०८२/८३ को एमबीबीएस प्रवेश परीक्षामा ७६.६ प्रतिशत अंक ल्याएर उत्तीर्ण गरेको मन्त्रालयले जनाएको छ । उनको कुल शैक्षिक उपलब्धि ६८६.६५ प्रतिशत रहेको उल्लेख गरिएको छ ।
सरकारले प्रचलित कानून तथा राष्ट्रिय चिकित्सा शिक्षा ऐन, २०७५ अन्तर्गतको नियमित निःशुल्क छात्रवृत्ति कोटाबाहेक अतिरिक्त ‘विशेष छात्रवृत्ति’ कोटाबाट उनलाई अध्ययनको अवसर दिने निर्णय गरेको छ । यसका लागि आवश्यक बजेट समेत सरकारले व्यवस्था गर्ने जनाएको छ ।
त्यस्तै, आन्दोलनका क्रममा घाइते तथा अपाङ्ग भएका नागरिकलाई राहत उपलब्ध गराउने कार्यविधि, २०८२ अनुसार चिकित्सा शिक्षा आयोगको अनुरोध र मन्त्रालयको प्रस्तावमा यस्तो निर्णय गरिएको पनि विज्ञप्तिमा उल्लेख छ । मन्त्रालयका प्रवक्ता सहसचिव शिवकुमार सापकोटाले जारी गरेको विज्ञप्तिमा सम्बन्धित सबैलाई यसबारे जानकारी लिन आग्रह गरिएको छ ।
