: अमेरिकी राष्ट्रपति डोनाल्ड ट्रम्पले ‘इरानलाई एकै रातमा ध्वस्त’ पार्ने धम्की दिएपछि युद्ध थप चर्किने संकेत बढेको छ । ट्रम्पले भनेका छन्, यदि इरानले आफूले दिएको समय सीमाभित्र अमेरिकासँग सम्झौता गर्न सकेन भने कारबाही ‘मंगलबार राति पनि हुन सक्छ ।’ ट्रम्पको प्रस्तावअनुसार इरानले होर्मुज जलडमरू खोल्नु पर्नेछ, जहाँबाट विश्वको करिब २० प्रतिशत तेल आपूर्ति हुने गर्छ ।
यो समय सीमा वाशिङ्टन डीसी समय अनुसार मंगलबार राति ८ बजे सकिँदैछ । ह्वाइट हाउसमा बोल्दै ट्रम्पले इरानका वर्तमान नेताहरू ‘राम्रो नियत’ का साथ वार्तामा रहेको विश्वास रहेको तर, नतिजा अझै अनिश्चित छ रहेको बताएका छन् ।
यसबीच, इरानले अस्थायी युद्धविराम प्रस्ताव अस्वीकार गरेको छ । यसको सट्टा उसले द्वन्द्व स्थायी रूपमा अन्त्य गर्न र प्रतिबन्ध हटाउन माग गरेको छ ।
ट्रम्पले समय सीमा नाघेपछि इरानलाई ‘पाषाण युग’ मा फर्काइने चेतावनी दिएका छन् । उनले भने, ‘त्यहाँ कुनै पुल रहने छैन, कुनै विद्युत् उत्पादन केन्द्र रहने छैन ।’
नाम नखुलाउने शर्तमा ती अधिकारीले सञ्चार प्रणाली प्रभावित रहेका कारण इरानसँग सन्देश आदानप्रदान गर्न गाह्रो भइरहेको बताएका छन् । यसैबीच इरानले संयुक्त राष्ट्रलाई एक पत्र लेख्दै अमेरिकाले इरानमा भएका शान्तिपूर्ण प्रदर्शनहरूलाई हिंसा, आन्तरिक अशान्ति र रक्तपातमा बदल्ने प्रयास गरेको आरोप लगाएको छ । इरानका समाचार एजेन्सीहरूले उक्त पत्रको पाठ फारसी भाषामा प्रकाशित गरेका छन् ।
संयुक्त राष्ट्रमा इरानका राजदूत अरिम सइद इरवानीले संयुक्त राष्ट्रका महासचिव एन्टोनियो गुटरेशलाई लेखेको पत्रमा अमेरिकी राष्ट्रपति डोनाल्ड ट्रम्पका बयानहरूको उल्लेख गरेका छन् । इरानले पत्रमा लेखेको छ, ‘यो स्वीकारोक्तिले इरानको त्यो दाबीलाई बलियो बनाउँछ, जसमा भनिएको थियो कि अमेरिकाले शान्तिपूर्ण प्रदर्शनहरूलाई हिंसा, आन्तरिक अशान्ति र रक्तपातमा बदल्ने प्रयास गरेको थियो ।’ अझै लेखिएको छ, ‘साधारण नागरिक, सर्वसाधारण र सरकारी संस्थाहरूलाई भएको क्षतिको लागि अमेरिका पूर्ण रूपमा जिम्मेवार छ ।’
