— कांग्रेस नेता शेखर कोइराला र उनी पक्षधर नेताहरू पूर्वकार्यवाहक सभापति पूर्णबहादुर खड्काले बोलाउने समानान्तर बैठक र छलफलमा सहभागी नहुने निर्णयमा पुगेका छन् । उनीहरूले पार्टी एकताका लागि संवादको थालनी गर्नुपर्नेमा जोड दिएका छन् ।
कांग्रेसको वैधानिकतासम्बन्धी विवादमा सर्वोच्च अदालतले आइतबार पेसी तोकेकाले त्यतिन्जेल पर्खने निर्णय कोइराला पक्षधर नेताहरूले यसअघि नै गरेका थिए । तर अदालतले आइतबार पेसीमा नचढाई सुनुवाइ स्थगन गरेको थियो । ‘अब अदालतको प्रतीक्षा पनि सकियो । अर्को तारिख कुरेर पार्टीलाई थप क्षति हुन दिन हुन्न । पार्टी एकताका लागि संवादको थालनी गर्नुपर्छ,’ अघिल्लो केन्द्रीय कार्यसमितिमा सहमहामन्त्री रहेका जीवन परियारले भने ।
परियारले आफूहरू एकताकै पक्षमा रहेको र एकताका लागि संवादको नेतृत्व सभापति गगन थापाले लिनुपर्ने बताए । उनले थपे, ‘शेखर कोइरालाले पनि पार्टी एकताकै लागि आफू संघर्षरत रहेको बताउँदै आउनुभएको छ । अलग्गिएर होइन, सम्पूर्ण एकतामा मात्रै पार्टीको भविष्य छ ।’
२७–३० पुसमा भएको विशेष महाधिवेशनबाट निर्वाचित केन्द्रीय कार्यसमितिलाई निर्वाचन आयोगले २ माघमा मान्यता दिएपछि पूर्वसभापति शेरबहादुर देउवा र पूर्वकार्यवाहक सभापति पूर्णबहादुर खड्काले ४ माघमा सर्वोच्चमा रिट हालेका थिए । त्यही मुद्दाको पेसी आइतबार तोकिएको थियो । निर्वाचन पछाडि देउवा पक्षले संस्थागत रूपमै समानान्तर गतिविधि चलाउँदै आएपछि कांग्रेसभित्र विवाद चुलिएको थियो । केन्द्रीय अनुशासन समितिले १८ चैतमा खड्कालाई सचेत गराउने र समानान्तर गतिविधि दोहोरिए कारबाही गर्ने चेतावनी दिएको थियो ।
ads/samsung-s26-desk-2032026113308.jpg
Koirala's side will not attend the parallel meeting called by Khadka.
तस्बिर : दीपक केसी/कान्तिपुर
खड्काले निर्वाचनको समीक्षा र समसामयिक राजनीतिक विषयमा छलफल गर्न भनेर १४ औं महाधिवेशनबाट निर्वाचित केन्द्रीय कार्यसमितिको बैठक भनेर गत साता धुम्बाराहीमा बैठक राखेका थिए । कोइरालाकै असहमतिले उक्त बैठक अनौपचारिक भेलामा परिणत भएको थियो । ‘समानान्तर बैठकका नाममा ब्यानर राख्न दिएनौं । यसबाट कुनै पनि निर्णय भनेर बाहिर ल्याउन दिएनौं,’ कोइराला पक्षकै अर्का एक नेताले भने, ‘अब कार्यवाहकको हैसियतमा बोलाइने कुनै पनि छलफलमा पनि हामी सहभागी हुँदैनौं । आवश्यक परे कोइरालालाई बैठक बोलाउनुहोस् भनेका छौं ।’
देउवा पक्षको ‘कोर समूह’ भित्र पनि एकताका लागि दबाब सुरु भएको छ । प्रतिनिधिसभा निर्वाचनमा भोटसमेत नहालेर १३ फागुनमा सिंगापुर गएका देउवा अझै फर्केका छैनन् । उनले त्यतैबाट गुट चलाउँदै आएका छन् र त्यसको नेतृत्व यता खड्काले गर्दै आएका छन् । उनीनिकट नेताहरूका अनुसार गत साता नै नेपाल फर्कने योजना रहेकामा मुलुकको पछिल्लो घटनाक्रमका कारण केही दिन बसाइ लम्बिएको छ ।
