: इरानले बहराइन र कुवेतको उर्जा केन्द्रमा क्षेप्यास्त्र प्रहार गरेको छ। जसका कारण खाडी मुलुकका महत्त्वपूर्ण ऊर्जा संयन्त्रहरूमा क्षति पुगेको छ।
बीबीसी फारसी सेवाका अनुसार बहराइन र कुवेतका तेल तथा विद्युत् केन्द्रहरूलाई निशाना बनाइएपछि ती क्षेत्रमा सुरक्षा सतर्कता उच्च पारिएको छ।
बहराइनको प्रमुख तेल कम्पनी बीएपीसीओ एनर्जीले आइतबार जारी गरेको विज्ञप्ति अनुसार इरानी हमलाका कारण कम्पनीको एउटा तेल भण्डारण ट्याङ्कमा भीषण आगलागी भएको थियो । तर अहिले उक्त आगलागीलाई नियन्त्रणमा लिइसकिएको छ।
कम्पनीका अनुसार यस घटनामा मानविय क्षति भने भएको छैन्। हाल प्राविधिक टोलीले हमलाबाट भएको भौतिक र आर्थिक क्षतिको आकलन गरिरहेको छ। बीएपीसीओ बहराइनको ऊर्जा क्षेत्रको मेरुदण्ड मानिन्छ । त्यसैले यस हमलालाई मुलुकको अर्थतन्त्रमाथिको प्रहारका रूपमा हेरिएको छ।
कुवेत सरकारले पनि इरानी ड्रोन हमलाबाट आफ्नो पूर्वाधारमा गम्भीर क्षति पुगेको पुष्टि गरेको छ। दुईवटा ठुला विद्युत् उत्पादन केन्द्रहरू क्षतिग्रस्त भएका छन्। समुद्री पानीलाई पिउनयोग्य बनाउने प्लान्टमा पनि क्षति पुगेको छ। यी सबै प्लान्टहरू हाल पूर्ण रूपमा बन्द गरिएको छ, जसका कारण आपूर्ति व्यवस्था प्रभावित भएको छ।
यसअघि भएका हमलाहरूमा पनि कुवेतको एक सरकारी कार्यालय परिसरमा ठुलो क्षति पुगेको थियो भने कुवेत पेट्रोलियम मन्त्रालयको भवनमा समेत आगलागी भएको समाचारमा उल्लेख छ। खाडी क्षेत्रका ऊर्जा केन्द्रहरूमा भइरहेका यी शृङ्खलाबद्ध हमलाहरूले अन्तर्राष्ट्रिय बजारमा तेलको मूल्य र क्षेत्रीय सुरक्षामा गम्भीर चुनौती थपेको छ।
