: अमेरिकी राष्ट्रपति डोनाल्ड ट्रम्पले दिएको पछिल्लो धम्कीपछि इरानको 'खातम अल-अनबिया सेन्ट्रल हेडक्वार्टर'ले कडा प्रतिक्रिया दिएको छ। इरानले अमेरिकी हमलाको स्थितिमा गम्भीर परिणाम भोग्नुपर्ने चेतावनी दिएको हाे।
शनिबार ह्वाइट हाउसबाट बोल्दै राष्ट्रपति ट्रम्पले इरानलाई सम्झौता गर्न वा होर्मुज स्ट्रेट खोल्नका लागि १० दिनको समय दिएको स्मरण गराएका थिए। उनले भनेका थिए, 'समय सकिन लागेको छ। उनीहरूमाथि कहर बर्सिन अब मात्र ४८ घण्टा बाँकी छ।' ट्रम्पको यो भनाइले खाडी क्षेत्रमा युद्धको सम्भावनालाई झनै बलियो बनाएको छ।
ट्रम्पको धम्की सार्वजनिक भएलगत्तै इरानको 'खातम अल-अनबिया सेन्ट्रल हेडक्वार्टर' ले कडा प्रतिक्रिया दिएको छ। बीबीसी फारसी सेवाका अनुसार मुख्यालयका कमाण्डर मेजर जनरल अली अब्दुल्लाहीले अमेरिकी हमला भएमा त्यसको परिणाम भयानक हुने चेतावनी दिएका छन्।
जनरल अब्दुल्लाहीले चेतावनी दिँदै भनेका छन्, 'यदि अमेरिकाले हमला गरेमा हामी उसको 'आतंकवादी सेना' र जायोनी शासन (इजरायल) सँग सम्बन्धित सबै पूर्वाधारहरूमा निरन्तर प्रहार गर्नेछौँ।' उनले अगाडि थपे, 'हामीले जे भनेका छौँ, त्यो गरेर देखाएका छौँ। यो सन्देशको सीधा अर्थ हो- तिम्रा लागि अब नर्कको ढोका खुल्नेछ।'
त्यस्तै, मुख्यालयका प्रवक्ता कर्नल इब्राहिम जुल्फकारीले पनि एक भिडियो सन्देश जारी गर्दै इरानलाई हराउने भ्रममा नपर्न अमेरिकालाई चेतावनी दिएका छन्। उनले भनेका छन्, 'यदि दुष्टता फैलियो भने यो पूरा क्षेत्र तिम्रा लागि नर्क बन्नेछ। इरानको हारको भ्रम तिम्रा लागि एउटा यस्तो दलदल बन्नेछ, जसमा तिमी आफैँ डुब्नेछौ।'
ट्रम्पले दिएको ४८ घण्टाको समयसीमा नजिकिँदै गर्दा विश्व समुदायको ध्यान अहिले खाडी क्षेत्रमा केन्द्रित भएको छ। अमेरिका र इरानबीचको यो वाकयुद्धले कुनै पनि बेला भौतिक सैन्य मुठभेडको रूप लिन सक्ने भन्दै चिन्ता जन्माएकाे छ।
