— लमजुङको मर्स्याङ्दी गाउँपालिका–७ उस्ताबेंसीमुनि शनिबार अपराह्न बोलेरो जिप दुर्घटना हुँदा २ जनाको मृत्यु भएको छ भने १२ जना घाइते भएका छन् ।
बेंसीसहरबाट मर्स्याङ्दी–७ छिनखोलातर्फ जाँदै गरेको ग १ ज ६४७० नम्बरको यात्रुबाहक जिप अपराह्न साढे ४ बजेतिर उकालोको घुमाउरो सडकबाट करिब ४०–५० मिटर तल खसेको प्रहरीले जनाएको छ । दुर्घटनामा परी मर्स्याङ्दी–७ उस्ताकी ४० वर्षीया त्रिवेणी घले र ३५ वर्षीया पुष्पा घलेको मृत्यु भएको हो । उनीहरूलाई उपचारका क्रममा बेंसीसहरस्थित प्रदेश अस्पताल लमजुङमा चिकित्सकले मृत घोषणा गरेका हुन् ।
जिल्ला प्रहरी कार्यालय लमजुङका प्रहरी निरीक्षक ज्ञानेन्द्रबहादुर क्षेत्रीका अनुसार घाइतेमध्ये उस्ताकै ४० वर्षीया विमलादेवी घले, ३३ वर्षीया रिता गुरुङ र ७ वर्षीय सफल गुरुङलाई चितवन मेडिकल कलेजमा रिफर गरिएको छ ।
अन्य घाइतेमध्ये ६२ वर्षीय सन्तबहादुर घर्ती, २९ वर्षीय चालक करण अधिकारी, ४८ वर्षीय रुद्रमान घले, १० वर्षीया प्रिशिका गुरुङ र ३८ वर्षीय सोमलाल तामाङको अवस्था मध्यम रहेको छ ।
यस्तै ३१ वर्षीय प्रकाश गुरुङ, १४ वर्षीय विमान घले, ९ वर्षीय इन्द्र घले र ११ वर्षीय रितेश गुरुङको अवस्था सामान्य रहेको प्रहरीले जनाएको छ ।
घाइतेहरूको उपचार बेंसीसहरस्थित प्रदेश अस्पताल लमजुङमा भइरहेको छ । घटनाबारे अनुसन्धान भइरहेको प्रहरीले जनाएको छ ।
