: मोरङको उर्लाबारीमा प्रहरीले छापा हानेर ठूलो मात्रामा प्रतिबन्धित औषधि तथा लागुऔषध बरामद गरेको छ । इलाका प्रहरी कार्यालय उर्लाबारीबाट खटिएको टोलीले शुक्रबार दिउँसो हजारौं ट्याब्लेट प्रतिबन्धित औषधि, ब्राउन सुगर र गाँजासहित दुई जना कारोबारीलाई पक्राउ गरेको हो ।
यस घटनाले उर्लाबारी क्षेत्र लागुऔषध कारोबारको संवेदनशील केन्द्र बन्दै गएको देखाउँछ । प्रहरीका अनुसार उर्लाबारी नगरपालिका–३ थापा चोकस्थित ललिता तामाङको घरको कोठा भाडामा लिएर बस्दै आएका दुई व्यक्तिको गतिविधि शंकास्पद देखिएपछि विशेष सूचनाका आधारमा निगरानी बढाइएको थियो ।
सोही सूचनाको आधारमा इलाका प्रहरी कार्यालय उर्लाबारीको टोलीले शुक्रबार करिब दिउँसो १ बजेतिर प्रतिबन्धित औषधि र लागुऔषधको भण्डार नै रहेको कोठामा छापा मारेको हो । छापा मार्दा कोठाभित्र ठूलो परिमाणमा प्रतिबन्धित औषधि र लागुऔषध लुकाएर राखिएको अवस्थामा फेला परेको मोरङ प्रहरी प्रमुख एसपी कवित कटवालले जानकारी दिएका छन् ।
उनका अनुसार पथरीशनिश्चरे नगरपालिका–४ का ४३ वर्षीय योगेन्द्र तुङहाङ र ४४ वर्षीय कमल दाहाल उक्त कोठामा बस्दै आएका थिए । उनीहरूले कोठा भाडामा लिएर त्यसलाई लागुऔषध तथा प्रतिबन्धित औषधि भण्डारण गर्ने गोप्य स्थानको रूपमा प्रयोग गरेको प्रारम्भिक अनुसन्धानले देखाएको छ । कोठाभित्र हरियो टिनको बाकसमा लुकाएर राखिएको विभिन्न प्रकारका औषधि तथा लागुऔषध फेला परेपछि दुवै जनालाई पक्राउ गरिएको एसपी कटवालको भनाइ छ ।
प्रहरीले डाइसीक्लोमिन हाइड्रोक्लोराइड, ट्रामाडोल, प्रामेथाजिन हाइड्रोक्लोराइड, निट्राजेपाम लगायतका औषधि ठूलो परिमाणमा फेला पारेको छ । ‘स्पासरेस्ट’ लेखिएको डाइसीक्लोमिन हाइड्रोक्लोराइड यूएसपी २ हजार ३ सय ५० ट्याब्लेट, ‘स्पासपेन फ्री’ लेखिएको डाइसीक्लोमिन एचसीएल २ हजार ५ सय २० ट्याब्लेट, ‘भोमिन–२५’ लेखिएको प्रामेथाजिन हाइड्रोक्लोराइड बीपी ३ सय ५० ट्याब्लेट र ‘ट्रामोल–५०’ लेखिएको ट्रामाडोल हाइड्रोक्लोराइड ९ हजार ५ सय ७० ट्याब्लेट बरामद भएको छ ।
त्यसैगरी ‘रिरिसपास–२०’ लेखिएको डाइसीक्लोमिन हाइड्रोक्लोराइड ९ हजार ३ सय ८० ट्याब्लेट, ‘बारालमुन’ लेखिएको डाइसीक्लोमिन ९ सय ४० ट्याब्लेट, ‘निट्जासेन–१०’ लेखिएको निट्राजेपाम १ हजार १ सय ६५ ट्याब्लेट तथा ‘एन्टिकफ’ लेखिएको हाइड्रोक्लोराइड र फेनाइलफ्रिन हाइड्रोक्लोराइड ३ सय ७० ट्याब्लेट पनि फेला परेको प्रहरीले जनाएको छ । २६ हजार ६५ ट्याब्लेट प्रतिबन्धित औषधि बरामद भएको एसपी कटवालले बताए ।
यससँगै कोठाबाट लागुऔषध ब्राउन सुगर (खैरो हेरोइन) र गाँजा समेत फेला परेको छ । प्रहरीका अनुसार ब्राउन सुगर दुई छुट्टाछुट्टै पोकामा २ ग्राम ७ सय मिलिग्राम र ५ ग्राम १ सय ९० मिलिग्राम गरी कुल ७ ग्राम ८ सय ९० मिलिग्राम बरामद भएको हो । साथै, २ किलो २ सय ३० ग्राम गाँजा पनि बरामद गरिएको छ । तुङहाङ र दाहालले भाडामा लिएको कोठालाई लागुऔषध भण्डारण तथा वितरण केन्द्रको रूपमा प्रयोग गरिरहेको पाइएको प्रहरीको भनाइ छ ।
प्रहरीले लागुऔषध कारोबारमा प्रयोग हुने डिजिटल तराजु, प्लास्टिकका रबर, मोबाइल फोन, नगद, स्कुटर र अन्य व्यक्तिगत सामान समेत नियन्त्रणमा लिइएको छ । घटनास्थलबाट प्र १–०२–०५९ प १८५९ नम्बरको डिओ कम्पनीको स्कुटर बरामद गरिएको प्रहरीले जनाएको छ । त्यस्तै, २२ हजार २ सय ७० रुपैयाँ नगद पनि फेला परेको छ ।
बरामद सामग्रीसँगै पक्राउ परेका तुङहाङ र दाहाललाई इलाका प्रहरी कार्यालय उर्लाबारीको हिरासतमा राखिएको छ । उनीहरूविरुद्ध लागुऔषध नियन्त्रण ऐनअन्तर्गतको मुद्दा चलाउन इन्स्पेक्टर नवीन ओली नेतृत्वको टोलीले अनुसन्धान गरिरहेको छ ।
प्रारम्भिक अनुसन्धानबाट उनीहरू लामो समयदेखि लागुऔषध तथा प्रतिबन्धित औषधिको अवैध कारोबारमा संलग्न रहेको पत्ता लागेको छ । मोरङ प्रहरी प्रमुख एसपी कटवालका अनुसार पक्राउ परेकाहरूको नेटवर्क, आपूर्ति स्रोत र वितरण प्रणालीका बारेमा पत्ता लगाउन विस्तृत अनुसन्धान सुरु गरिएको छ । उनका अनुसार लागुऔषध भारतबाट भित्रिएको हुन सक्ने आशंका रहेकाले त्यसको सम्पूर्ण मार्ग, संलग्न व्यक्ति तथा स्थानीय सहयोगीहरूको पहिचान गर्न अनुसन्धान केन्द्रित गरिएको छ ।
उनले भने, ‘विभिन्न कोणबाट विस्तृत अनुसन्धान सुरु गरिएको छ । लागुऔषधको कारोबार, ओसारपसार एवं भण्डारणमा अरु कोही जोडिएका छन् कि भनेर पत्ता लगाउने प्रयास भइरहेको छ ।’ प्रहरीले यस घटनालाई उर्लाबारी क्षेत्रको लागुऔषध कारोबारको गम्भीर संकेतको रूपमा लिएको छ । पछिल्लो समय पूर्वी नेपालका विभिन्न क्षेत्रमा लागुऔषधको कारोबार बढ्दै गएको पृष्ठभूमिमा यस्ता ठूलो परिमाणका बरामदले संगठित गिरोह सक्रिय रहेको आशंका थप बलियो बनाएको छ । प्रहरीका अनुसार यस्ता अवैध गतिविधि नियन्त्रणका लागि सक्रियता बढाइएको छ ।
पक्राउ परेकाहरूको सम्पर्क, मोबाइल डेटा, आर्थिक लेनदेन र यातायात साधनको प्रयोग समेतलाई ध्यानमा राखेर सूक्ष्म रूपमा अध्ययन भइरहेको प्रहरीले जनाएको छ । साथै, उनीहरू अन्य कुनै गिरोह वा अन्तर्राष्ट्रिय सञ्जालसँग जोडिएका छन् कि छैनन् भन्ने विषयमा पनि अनुसन्धान केन्द्रित गरिएको प्रहरीको भनाइ छ । यस्ता अवैध धन्दा तत्काल नियन्त्रणमा लिइने बताउँदै एसपी कटवालले कुनै शंकास्पद गतिविधि देखिएमा तत्काल प्रहरीलाई जानकारी दिन सबैमा अनुरोध गरेका छन् ।
