— त्रिभुवन अन्तर्राष्ट्रिय विमानस्थल क्षेत्रबाट यात्रुहरूलाई दुःख हैरानी दिने तथा ठगी गरेको आरोपमा प्रहरीले १८ जनालाई नियन्त्रणमा लिएको छ।
काठमाडौं प्रहरी परिसरका प्रवक्ता एसपी पवन भट्टराईका अनुसार काठमाडौं महानगरपालिका–९ स्थित विमानस्थल क्षेत्रमा खटिएको प्रहरी टोलीले उनीहरुलाई पक्राउ गरेको हो।
उनीहरुले यात्रुहरूलाई जबरजस्ती तान्ने, विभिन्न प्रलोभनमा पारेर आफ्ना सम्पर्कका होटलमा लैजाने तथा त्यसबापत होटल र यात्रुबाट कमिसन लिने गरेका थिए।
त्यस्तै आपसमा झगडा गर्ने तथा अभद्र व्यवहार गर्ने गतिविधिमा समेत संलग्न रहेकाहरू छन्।
पक्राउ पर्नेहरूमा सर्लाही घर भई सिनामंगल बस्ने १८ वर्षीय सूर्य माझी, बाँके घर भई एयरपोर्ट बस्ने २२ वर्षीय एकेश तामाङ, पाँचथर घर भई एयरपोर्ट बस्ने २६ वर्षीय प्रेमकुमार मगर, सिन्धुली घर भई नयाँबस्ती बस्ने ३२ वर्षीय राजकुमार राई, मकवानपुर घर भई एयरपोर्ट बस्ने ४० वर्षीय मंगलमान घलान, पाँचथर घर भई टोखा बस्ने ३८ वर्षीय खगेन्द्र लिम्बु रहेका छन्।
त्यस्तै मोरङ घर भई एयरपोर्ट बस्ने २९ वर्षीय आशिष खतिवडा, मकवानपुर घर भई सम्भुमार्ग बस्ने ३४ वर्षीय बिश्व मोक्तान, धनुषा घर भई एयरपोर्ट बस्ने ४५ वर्षीय वीरेन्द्र झा, सिराहा घर भई तिलगंगा बस्ने ६० वर्षीय लड्डा मियाँ, मोरङ घर भई नयाँ बसपार्क बस्ने ४६ वर्षीय परशुराम राई, रामेछाप घर भई भक्तपुर बस्ने २७ वर्षीय सन्तु तामाङ, धनुषा घर भई तिलगंगा बस्ने ५३ वर्षीय रघुवीर शाहलाई पनि पक्राउ गरेको छ।
महोत्तरी घर भई तिलगंगा बस्ने ३३ वर्षीय राजीवकुमार रावत, धनुषा घर भई गौशाला बस्ने २६ वर्षीय सरोजकुमार महतो, मकवानपुर घर भई गौशाला बस्ने १९ वर्षीय अजय लामा, झापा घर भई सिनामंगल बस्ने ३९ वर्षीय केशव लिम्बु, बझाङ घर भई सिनामंगल बस्ने २० वर्षीय रामप्रसाद जोशी र बझाङ घर भई कीर्तिपुर बस्ने २९ वर्षीय विमलराज जोशीलाई पनि प्रहरीले नियन्त्रणमा लिएको हो।
