— नेपाली कांग्रेसका तत्कालीन कार्यवाहक सभापति पूर्णबहादुर खड्काले मंगलबार बोलाएको बैठक नेता शेखर कोइराला पक्षीय नेताहरूको असहमतिपछि अनौपचारिक भेलामा परिणत भएको छ । खड्काले १४औं महाधिवेशनबाट निर्वाचित केन्द्रीय कार्यसमितिको बैठकका रूपमा तत्कालीन पदाधिकारी तथा सदस्यहरूलाई धुम्बाराहीस्थित होटल स्मार्टमा बोलाएका थिए । बैठकस्थलमा पार्टीको झन्डा र ब्यानर राखेर औपचारिक रूपमा बैठक सञ्चालन गर्ने तयारी गरिएको थियो । तर शेखरपक्षीय नेताहरूले त्यसमा आपत्ति जनाएपछि कार्यक्रमकोस्वरूप परिवर्तन गरिएको सहभागी नेताहरूले बताएका छन् ।
बैठकमा सहभागी एक केन्द्रीय सदस्यका अनुसार औपचारिक केन्द्रीय समिति बैठकको स्वरूप दिन खोजिएको विषयमा विवाद उत्पन्न भएको थियो । 'ब्यानर र झन्डामुनि केन्द्रीय समितिको बैठक भनेर बोलाउँदा समानान्तर गतिविधि चलाएको सन्देश जाने भएकाले त्यस्तो गर्न हुन्न भनेर हामीले ब्यानर राख्न मानेनौं,' ती सदस्यले भने, 'त्यसपछि बैठक अनौपचारिक भेलामा परिणत गरिएको हो ।'
पछिल्लो समय खड्का पक्षले समानान्तर गतिविधि चलाएको आरोप लगाउँदै संस्थापन पक्ष असन्तुष्ट बन्दै आएको छ । यही विषयलाई लिएर संस्थापन पक्षले समानान्तर गतिविधिमा संलग्नमाथि स्पष्टीकरण सोध्ने तयारीस्वरूप केन्द्रीय अनुशासन समितिको बैठक भोलिका लागि बोलाएको छ ।
शेखरपक्षीय नेताहरू भने अनौपचारिक भेटघाट र समूहगत छलफल कांग्रेसभित्र नयाँ विषय नभएको बताउँछन् । शेखर पक्षका अर्का एक नेताले भने, 'यस्ता अनौपचारिक बैठक पहिले पनि फरक विचार समूहबीच हुँदै आएका छन् । कहिले कसैले गरेको छ, कहिले कसैले । अनौपचारिक भेला र गुटगत छलफल कांग्रेसमा पहिलेदेखि भइरहेका छन्, यसलाई अन्यथा लिनु हुँदैन ।'
भेलामा कुनै औपचारिक निर्णय नभएको सहभागीहरूले बताएका छन् । बैठक भोलि पनि जारी रहने जनाइएको छ ।
