: गत भाद्र २३ र २४ को आन्दोलनका क्रममा रौतहट कारागारबाट फरार भएका दुई जना कैदीबन्दी पक्राउ परेका छन्। रौतहट सदरमुकाम गौरस्थित कारागार फुटाएर फरार भएका दुर्गाभगवती गाउँपालिका–५, वडहर्वाका २९ वर्षीय दिपेश साह सोनार (सेरु साह) लाई सर्लाही प्रहरीले नियन्त्रणमा लिएको हो ।
उनी जबरजस्ती करणी मुद्दामा १२ वर्ष कैद सजाय तोकिएका ब्यक्ति भएको रौतहट प्रहरी प्रमुख, प्रहरी उपरीक्षक सीताराम रिजालले जानकारी दिए ।
पक्राउ परेका सोनार भदौ २४ गते राति आन्दोलनको मौका छोपी कारागार फुटाएर फरार भएका थिए ।
त्यस्तै आन्दोलनका क्रममा गौर कारागारबाट फरार भएका चोरी मुद्दाका दोगौर नगरपालिका–३ का २४ वर्षीय अफताब अन्सारीलाई रौतहट प्रहरीले पक्राउ गरेको छ । जिल्ला अदालत गौरले उनलाई ४ वर्ष ३ महिना कैद सजाय तोकेको थियो, जसमध्ये उनले ३ वर्ष १० महिना २७ दिन कैद भुक्तान गरिसकेका थिए ।
आन्दोलनको मौका छोपी फरार भएका अन्सारीलाई विशेष सूचनाका आधारमा गौर–३ पोखरिया टोलबाट नियन्त्रणमा लिई गौर कारागार पठाइएको प्रहरी उपरीक्षक रिजालले जानकारी दिए । रौतहटमा जेनजी आन्दोलनको मौकामा विभिन्न गम्भीर प्रकृतिका मुद्दामा दोषी ठहर भई जेलबाट अझै १२३ जना कैदीबन्दी फरार छन् भने उनीहरुको खोजी कार्य जारी रहेको रौतहट प्रहरी प्रमुख रिजालले बताए ।
