: विभिन्न प्रलोभनमा पारी कम्बोडिया पुर्याइएका १२ नेपालीको उद्धार गरिएको छ । विभिन्न प्रलोभनमा परी कम्बोडिया पुगेका र त्यहाँ अवैध रुपमा सञ्चालित अनलाइन स्क्र्यामिङ केन्द्रहरु, क्यासिनोहरुमा अनलाइन ठगी र अन्य विभिन्न गैरकानुनी काममा लगाइएका १२ नेपालीको उद्धार गरिएको हो ।
कम्बोडियास्थित नेपाली राजदूताबास र कम्बोडिया सरकारको सहयोगमा उद्धार गरिएका उनीहरुलाई गैरआवासीय नेपाली संघ कम्बोडियाको सहजीकरणमा उद्धार गरी सोमबार नेपाल फकाइएको हो । यस्तै कम्बोडियामा अलपत्र परेका र कठिन परिस्थितिमा रहेका नेपालीहरुलाई समेत पस्वदेश फर्काउने पहल भइरहेको जनाइएको छ । कम्बोडियामा नेपालीहरुलाई अनलाइन ठगीलगायत गैरकानुनी काममा लयाइएको र बिना भिसा र भिसा अवधि भन्दा बढी समय बसिरहेको जानकारी प्राप्त भएको पनि कम्बोडियाको समेत जिम्मेवारी सम्हालिरहेको नेपाली राजदूतावास बैंककले विज्ञप्तीमार्फत जनाएको छ ।
कम्बोडियामा अवैध रुपमा बसिरहेका नेपालीहरुलाई नेपाली राजदूतावास बैंकक वा गैरआवासीय नेपाली संघ कम्बोडियाका प्रतिनिधि शिवराज पराजुली (८५५१२२१५५७८), लालसिंह खड्का (८५५९३२०३६६६) र रामजीकुमार क्षेत्री (८५५९६३४६५७८८) मा सम्पर्क गर्न आग्रह गरिएको छ । कम्बोडियाका पर्यटनसमबन्धी तथ्याङ्क अनुसार सन् २०२१ मा १०१ नेपाली भ्रमण भिसामा कम्बोडिया गएकोमा सन् २०२२ मा १९७७ जना, २०२३ मा २९४०, २०२४ मा ६४०४ र २०२५ मा ९६७६ जना नेपाली कम्बोडिया गएको देखिएको छ ।
नेपाल सरकारले तोकेको मापदण्ड बमोजिम श्रम स्वीकृति लिएर मात्र वैदेशिक रोजगारीमा जान तथा कसैको प्रलोभनमा परी छिटो र धेरै पैसा कमाउने लोभमा कम्बोडिया, लाओस, म्यानमार, थाइल्याण्डलगायतका मुलुकहरुमा भ्रमणको वहाना गरी वैदेशिक रोजगारीमा नआउन समेत नेपाली राजदूतावास बैंककले सचेत गराएको छ ।
