: जेनजी आन्दोलनमा केन्द्रीय कारागारबाट फरार भएका अभियुक्त पुनः लागुऔषधसहित पक्राउ परेका छन्। पक्राउ पर्नेमा २८ वर्षीय अन्जान राई रहेका छन्।
लागुऔषध नियन्त्रण ब्यूरो कोटेश्वरबाट विभिन्न मितिमा ४ वटा मुद्दा दर्ता भई काठमाडौं जिल्ला अदालतको आदेशले ३१ वर्ष कैद सजाय र साढे ४ लाख जरिवाना फैसला भएका राई जेनजी आन्दोलनमा फरार भएका थिए। लागुऔषध नियन्त्रण ब्यूरोको टोलीले उनलाई २५३ ग्राम खैरो हेरोइनसहित पक्राउ गरेको हो।
थप अनुसन्धानको सिलसिलामा चैत १४ गते काठमाडौंको टोखा नगरपालिका-३ बाट अन्जान राई संलग्न गिरोहका झापाको बिर्तामोड नगरपालिका-४ का ३२ वर्षीय सुवास भन्ने दोर्जे तामाङ र काठमाडौंको टोखा नगरपालिका-३ का २४ वर्षीय राहुल डंगोल समेतका २ जनालाई लागुऔषध खैरो हेरोइन ५२.७५० ग्राम र डिजिटल तराजु थान १ सहित पक्राउ गरेको ब्युरोका सूचना अधिकारी दुर्गाराज रेग्मीले बताएका छन्।
पक्राउ प्रतिवादीहरू उपर लागुऔषध (नियन्त्रण) ऐन २०३३ बमोजिम काठमाडौं जिल्ला अदालतबाट ५ दिनको म्याद थप भई अनुसन्धान भइरहेको ब्युरोले जनाएको छ।
