: अमेरिकी राष्ट्रपति डोनाल्ड ट्रम्पले इरानसँगको जारी तनाव र युद्ध अन्त्यका लागि अमेरिकाले राखेको १५-बुँदे मागका अधिकांश सर्तहरूमा तेहरान सहमत भएको दाबी गरेका छन्।
आइतबार 'एयर फोर्स वन' मा पत्रकारहरूसँग कुरा गर्दै राष्ट्रपति ट्रम्पले पाकिस्तानमार्फत पठाइएको शान्ति योजनामा इरान सकारात्मक देखिएको बताएका हुन्। राष्ट्रपति ट्रम्पका अनुसार अमेरिकाले इरानसमक्ष १५ वटा मुख्य मागहरू राखेको थियो। जस्मा इरानले केही बुँदाहरूमा सहमति दिएको ट्रम्पको दाबी छ । ट्रम्पले भने, 'हामीले मागेका १५ मध्ये धेरैजसोमा कुरा मिलेको छ, अब हामी थप केही कुराहरू पनि राख्ने तयारीमा छौँ।'
यद्यपि, इरानी विदेशमन्त्री अब्बास अराघचीले भने मध्यस्थकर्तामार्फत सन्देश आदानप्रदान भएको स्वीकार गरे तापनि वासिङ्टनको अडानप्रति केही संशय व्यक्त गरेका छन्।
सीएनएनका अनुसार तर यता इरान आफ्नो प्रतिबद्धतामा कति गम्भीर छ भन्ने प्रमाणित गर्न उसले अमेरिकालाई ठूलो मात्रामा तेल उपलब्ध गराएको ट्रम्पले खुलासा गरे। उनले इरानले १० जहाज तेल पठाएको र थप २० जहाज तेल अर्काे ढुवानीमा आउने बताए । ट्रम्पले यसलाई इरानको तर्फबाट 'उपहार' को संज्ञा दिँदै प्रत्यक्ष र अप्रत्यक्ष दुवै माध्यमबाट भइरहेका बैठकहरू सकारात्मक रहेको बताएका छन्।
