— अमेरिकामा इरान युद्ध र मुल्यवृद्धिको विरोधमा आयोजना गरिएको प्रदर्शनमा हजारौं जनता सहभागी भएका छन् । सामाजिक अभियान 'नो किङ्ग्स' ले आयोजना गरेको यस विरोध र्यालीलाई साथ दिदैं ३ हजार स्थानमा प्रदर्शन भयो ।
सहभागीहरूले अमेरिकी राष्ट्रपति डोनाल्ड ट्रम्पको आप्रवासन विरोधी नीतिको कडा विरोध गरेका थिए । लस एन्जलस, न्युयोर्क, वासिङटन डिसीलगायत ठूला शहरसँगै साना गाउँहरूमा पनि मानिसले विरोध प्रदर्शन गरे ।
मिनियापोलिसमा दशौं हजार सडकमा
मिन्नेसोटाको मिनियापोलिस शहरमा भएको र्यालीमा सहभागी दशौँ हजार प्रदर्शनकारीहरूले ट्रम्पको कडा आप्रवासन नीतिको विरोध गरे । केही महिनाअघि यहाँ संघीय इग्रिमेशन एजेन्टहरुको विरोधमा प्रदर्शन भएको थियो ।
जनवरीमा एजेन्टहरुले विवादास्पद छापा मार्ने क्रममा गोली चलाउँदा दुई अमेरिकी नागरिक रेनी गुड र एलेक्स प्रिटीको मृत्यु भएको थियो । उक्त घटनाले ट्रम्पको आप्रवासन नीति विरुद्ध व्यापक आक्रोश जन्माएको थियो ।
गत वर्षदेखि आम नागरिकको पहलमा सुरु भएको ‘नो किङ्ग्स’ आन्दोलन अन्तर्गत यो तेस्रो ठूलो प्रदर्शन हो, जसले ट्रम्पको नेतृत्व शैली र दक्षिणपन्थी एजेन्डाप्रति असहमति जनाउँदै आएको छ ।
प्रदर्शनमा सहभागीहरूले ‘कुनै राजा छैन, कुनै आइस छैन, कुनै युद्ध छैन !’ जस्ता नाराहरू घन्काएका थिए, जसले आप्रवासन कार्यान्वयन निकाय ‘आइस’ (आइसिई) विरुद्धको असन्तोषलाई समेत प्रस्ट पारेको थियो ।
कार्यक्रमको सांस्कृतिक पक्ष पनि प्रभावशाली देखिएको थियो । चर्चित सङ्गीतकार ब्रुस स्प्रिङ्गस्टीनले छिमेकी सेन्ट पल सहरमा आयोजित कार्यक्रममा प्रस्तुति दिँदै ‘स्ट्रिट्स अफ मिनियापोलिस’ गीतमार्फत मृतक गुड र प्रिटीप्रति श्रद्धाञ्जली व्यक्त गरे ।
र्यालीमा सहभागी ७३ वर्षीया पामेला सिन्नेसले आफू सबै मानिसहरूको समान अधिकारको पक्षमा उभिन आएको बताइन् ।
राजनीतिक नेतृत्वले पनि विरोधमा स्वर मिलाएको देखिएको छ । मिनेसोटाका गभर्नर टिम वाल्जले प्रदर्शनकारीहरूलाई धन्यवाद दिँदै ट्रम्पको आलोचना गरेका छन् ।
त्यस्तै, वामपन्थी नेता बर्नी स्यान्डर्सले प्रदर्शनकारीलाई सम्बोधन गर्दै ट्रम्पमाथि संविधान र कानूनी शासनको अवमूल्यन गरेको आरोप लगाएका छन् ।
