: प्रधानमन्त्री कप एक दिवसीय राष्ट्रिय क्रिकेट प्रतियोगिता–२०२६ मा बागमती प्रदेशलाई ७ विकेटले पराजित गर्दै नेपाल पुलिस क्लबले प्रतियोगितामा दोस्रो जित दर्ता गरेको छ ।
माथिल्लो मूलपानी मैदानमा टस जितेर ब्याटिङ गरेको बागमती ४९.२ ओभरमा अलआउट हुँदै २६५ रन बनाएको थियो । बागमतीले दिएको २६६ रनको विजयी लक्ष्य पछ्याएको नेपाल पुलिस क्लबले ४४ ओभरमा ३ विकेटको क्षतीमा २७१ रनसहित लक्ष्य पूरा गरेको हो ।
पहिलो विकेटको लागि ओपनर दिनेश खरेल र शंकर रानाले १५९ रनको शतकीय साझेदारी गरे । जसमा शंकर रानाले उत्कृष्ट शतकीय पारी खेले । उनले १२८ बलमा १३ चौका र ४ छक्का प्रहार गरे । अर्का ओपनर दिनेश खरेलले ७५ बलमा ८ चौका र ३ छक्कासहित ७० रन बनाए । कप्तान आरिफ शेद ४३ र रासिद खान १० रनमा अविजित रहे ।
बागमतीका लागि बलिङतर्फ रिजन ढकाल, सन्दीप लामीछाने र सुवास खत्रीले १–१ विकेट लिए । त्यसअघि, पहिलो इनिङ्समा ब्याटिङ गरेको बागमतीको लागि पवन थापाले सर्वाधिक ७९ रन बनाए । उनले १०१ बलमा ६ चौका र १ छक्का प्रहार गरे । इशान पाण्डेले ८० बलमा ६ चौका र ३ छक्कासहित ७० रन बनाए ।
ओपनरद्वय आशुतोष घिरौया र शुभ कंशाकरले क्रमशः २२ र १४ रन बनाए । शिवम तिवारीले १२ रन, उत्तम मगरले २१ र कप्तान सन्दीप लामिछानेले १३ रन बनाए । अन्य ब्याटरले भने दोहोरो अंकमा रन बनाउन सकेनन् । नेपाल पुलिस क्लबलका लागि बलिङतर्फ रासिद खान र दिनेश खरेलले ३÷३ विकेट लिए । करण केसीले २ र ललित राजवंशीले १ विकेट लिए ।
पुलिस र बागमती दुवैको जारी प्रतियोगितामा यो तेस्रो खेल थियो । जसमा पुलिसले दोस्रो जित दर्ता गरेको हो भने बागमतीले दोस्रो हार बेहोरेको हो । पहिलो खेलमा नेपाल पुलिस क्लब त्रिभुवन आर्मी क्लबसँग २२ रनले हार बेहोरेको थियो । दोस्रो खेल विभागीय डर्बीमा पुलिसले एपीएफलाई १८५रनले हराएको थियो । त्यस्तै बागमतीले पहिलो खेलमा एपीएफसँग ७१ रनले हारेको थियो । दोस्रो खेलमा बागमती प्रदेशले गण्डकी प्रदेशलाई १७० रनले हराएको थियो ।
