— चालु आर्थिक वर्षको दुई तिहाई समय अर्थात आठ महिना सकिँदा भरतपुर महानगरपालिकाले विकास बजेट (पुँजीगत खर्च)को एक चौथाई मात्र खर्च गर्न सकेको छ ।
महानगरले दोस्रो चौमासिक अवधिमा सम्पन्न गरेका योजना तथा कार्यक्रम र सेवा प्रवाहका बारेमा जानकारी दिन बिहीबार आयोजना गरेको सार्वजनिक सुनुवाईमा महानगरका प्रमुख प्रशासकीय अधिकृत वीरेन्द्रदेव भारतीले पुँजीगत बजेट २ अर्ब ६० करोड ७७ लाख ६८ हजार ११९ रुपैयाँ रहेकोमा हालसम्म ६५ करोड ८५ लाख ८५ हजार ६७० रुपैयाँ खर्च भएको जानकारी दिए ।
जुन रकम पुँजीगत बजेटको २५ दशमलब २५ प्रतिशत हुन्छ । चालु बजेट २ अर्ब ५८ करोड ८९ लाख ४७ हजार ८८१ रहेकोमा ४९ दशमलब २ प्रतिशत खर्च भएको छ । ‘चालु आर्थिक वर्षका लागि अनुमानित बजेट ५ अर्ब १९ करोड ७१ लाख ६६ हजार रुपैयाँ रहेकोमध्ये हालसम्म १ अर्ब ९३ करोड २३ लाख ६ हजार ६९८ रुपैयाँ खर्च भएको छ । यो बजेटको ३७ दशमलब १८ प्रतिशत मात्र खर्च हो,’ भारतीले भने । त्यसैगरी राजश्व तर्फ ३७ दशमलब ९२ प्रतिशत प्रगति भएको उनले जानकारी दिए ।
चालु आर्थिक वर्षमा महानगरले आन्तरिक राजश्वतर्फ ९३ करोड १५ लाख रुपैयाँ र विभाज्यतर्फ ८६ करोड ८५ लाख गरी १ अर्ब ८० करोड रुपैयाँ राजश्व संकलन गर्ने लक्ष्य राखेको थियो । जसमध्ये फागुनसम्म आन्तरिकतर्फ ५२ दशमलब २१ प्रतिशत अर्थात ४८ करोड ६३ लाख १८ हजार ४४३ रुपैयाँ राजश्व संकलन भएको छ । विभाज्यतर्फ २२ दशमलब ६० प्रतिशत प्रगति भएको छ ।
महानगरको मुख्य तथा गौरवको आयोजनाका रुपमा रहेको गौतम बुद्ध अन्तराष्ट्रिय रंगशालाको भौतिक प्रगति ४५ प्रतिशत पुगेको प्रमुख प्रशासकीय अधिकृत भारतीले जानकारी दिए । रंगशाला निर्माणमा ३४ करोड ८० लाख रुपैयाँ खर्च भएको छ । तर बागमती प्रदेश सरकारले दिने रकम हालसम्म पनि निकासा नभएको भारतीयले सुनाए ।
