: नेकपा एमाले अध्यक्ष केपी शर्मा ओलीले गौरीबहादुर कार्की आयोगको प्रतिवेदन खेदजनक रहेको बताएका छन्।
उनले आयोगको प्रतिवेदनलाई मानसिक रूपमा तनाव दिने कुकर्म भएको बताए। 'आयोगको प्रतिवेदन चरम लापरबाही, चरित्र हत्या गर्ने र घृणाको राजनीति गर्ने खालको छ। यो अत्यन्तै निन्दनीय र खेदजनक छ। अस्वीकार्य छ। प्रधानमन्त्री भएबापत अपराधी हुनुपर्ने? कस्तो स्तरहीन खालको क्रियाकलाप भइरहेको छ?,' अध्यक्ष ओलीले प्रश्न गरे।
अध्यक्ष ओलीले कार्की आयोगको प्रतिवेदनले एमाले पार्टीमाथि नै प्रहार गरेको बताए। उनले पूर्वाग्रह ढंगले प्रतिवेदन तयार पारिएको बताए। 'यथार्थ प्रतिवेदन आउँदैन भनेर हामीले भनिसकेका थियौं। एमाले अध्यक्ष र तत्कालीन प्रधानमन्त्री, जसको घटनास्थलमा उपस्थितिc नै छैन अनि तिनकाविरुद्ध फौजदारी अभियोगअन्तर्गत छानबिन गर्न र मुद्दा चलाउन सिफारिस गरेको छ,' उनले भने।
उनले मान्छेहरू अहिले पनि मारिने गरेको बताउँदै कति मान्छे मारिए प्रधानमन्त्रीलाई मुद्दा चलाउने भनेर प्रश्न गरे। 'अहिले पनि मान्छे मारिएका छन्।न त्यसको जिम्मा कसले लिने? कसैको काख त रित्तिएको छ नि। अनि कति जना मारियो भने प्रधानमन्त्री जिम्मेवार हुने र कति मान्छे मारिँदा प्रधानमन्त्री जिम्मेवार नहुने? १९ कि १८?,' उनले प्रश्न गरे।
न्यायाधीश भइसकेका र प्रहरीका उच्च ओहोदामा बसिसकेका मान्छेहरूले गरेको छानबिन अत्यन्त निराधार रहेको उनको भनाइ छ। उनले आयोगको प्रतिवेदनमा चरम लापरबाही गरिएको बताए।
विषम परिस्थितिमा अत्यन्तै जिम्मेवार भएर प्रभावकारी भूमिका निर्वाह गर्न उनले निर्देशन दिए। 'हामी देश र जनताका लागि काम गर्दैछौं। त्यसमा अवश्य सफलता पाउनेछौं,' उनले भने।
उनले निर्वाचनको समीक्षा गर्ने बेला भइनसकेको बताए। उनले देशमा अस्थिरता चाहनेहरूले घृणाको राजनीति गरेको आरोप लगाए। 'त्यसका लागि उनीहरूलाई धेरैले सहयोग गरे। लोकतन्त्र र विकासको लहर ल्याएकै कारण उनीहरूले हाम्राविरुद्ध प्रहार गरे,' उनले भने। विरोधीहरूले भ्रम, अश्लीलजस्ता कूप्रचारसमेत गरेको अध्यक्ष ओलीले आरोप लगाए।
एमाले अध्यक्ष ओलीले अनुशासनमा रहेर पार्टीको विचार र सिद्धान्तअनुरुप चल्न निर्देशन दिए। उनले अरुका गलत प्रवृत्ति र अराजकता नसिक्न आग्रह गरे। 'हाम्रो जतिको एडभान्स विचार बोक्ने कुनै पार्टी छैन, परिवर्तनकारी र अनुशासित पार्टी हो। यो जतिको अनुशासित पार्टी अरु छैन। त्यसैले साथीहरूले त्यो अनुशासन पालना गर्नुहोला,' उनले भने।
अध्यक्ष ओलीले दुवै सदनका सांसदहरूलाई जिम्मेवारी तोक्ने बताए। उनले पार्टीले नै संसदीय दलको नेता, प्रमुख सचेत र सचेतक तोक्ने निर्णय गर्ने संकेत गरे। उनले यो पद र त्यो पद दिनुस् भनेर नमाग्न आग्रह गरे। 'पार्टीले सबैको मूल्यांकन गर्छ। काम र जिम्मेवारीको आधारमा मूल्यांकन गर्छ। यो पद र त्यो पद भनेर हुँदैन,' उनले भने।
