: मध्यपूर्वमा बढ्दो तनावका बीच अमेरिकाले विभिन्न मध्यस्थकर्ताहरूमार्फत इरानलाई सन्देश पठाउन सुरु गरेको छ। इरानका विदेशमन्त्री अब्बास अरागचीले पछिल्ला केही दिनदेखि अमेरिकाबाट निरन्तर सन्देशहरू आइरहेको खुलासा गरेका हुन्।
इरानी सरकारी टेलिभिजनलाई दिएको अन्तर्वार्तामा विदेशमन्त्री अरागचीले ती सन्देशहरू 'मित्रवत देशहरू' मार्फत प्राप्त भएको बताएका छन्। उनले भने, 'अमेरिकाले फरक–फरक मध्यस्थकर्ताहरू प्रयोग गरेर हामीलाई सम्पर्क गर्ने प्रयास गरिरहेको छ।'
प्राप्त सन्देशहरूको जवाफमा इरानले आफ्नो स्पष्ट अडान र चेतावनी पठाएको अरागचीले जानकारी दिए। उनले यसलाई वार्ता वा कुनै सम्झौताको प्रयास नभएको स्पष्ट पारेका छन्।
उनले भनेका छन्, 'यो न त कुनै वार्ता हो, न कुनै लेनदेन, न त त्यस्तै कुनै अरु प्रक्रिया नै हो, इरानको अहिलेको नीति आफ्नो सुरक्षा गर्ने मात्र हो। तत्काल अमेरिकासँग कुनै पनि प्रकारको वार्ता गर्ने हाम्रो कुनै इरादा छैन।'
अरागचीले वर्तमान संकटका लागि इजरायललाई जिम्मेवार ठहर्याएका छन्। उनले यो इजरायलले सुरु गरेको लडाइँ भएको र यसको भारी मूल्य अमेरिकाका साथै मध्यपूर्वका सर्वसाधारणले चुकाउनुपरेको टिप्पणी गरे।
युद्ध अन्त्यका लागि अमेरिकाको यस अघि १५ बुँदे सम्झौताको खाका पाकिस्तानमार्फत इरानलाई हस्तान्तरण गरेको थियो। जुन प्रस्ताव इरानले सिधै अस्वीकार गरेको हो ।
