रुकुम पश्चिमको चौरजहारीबाट बिरामी लिएर नेपालगन्जतर्फ जाँदै गरेको सल्यानको कुमाख गाउँपालिकाको एम्बुलेन्समा एक समूहले आक्रमण गरेको छ । कुमाख गाउँपालिकाको कर्णाली प्रदेश ०२.००१ झ ०१३८ नम्बरको एम्बुलेन्समा सुर्खेतको छिन्चुनजिकै रामघाट बजारमा गएराति १० बजेतिर एक समूहले आक्रमण गरेको हो ।
आठ/नौ जनाको समूहमा आएका युवाले एम्बुलेन्स तोडफोड गर्नुका साथै आफूलाई कुटपिट गरेको चालक वसन्त शर्माले बताए । ‘ज्यानको जोखिम भएपछि भागेर ज्यान बचाएा,’ उनले भने । चालक भागेपछि आक्रमणकारीले एम्बुलेन्स तोडफोड गरेका थिए । एम्बुलेन्स तोडफोड र चालकमाथि कुटपिट गर्नुको कारण भने खुलेको छैन ।
मदिरा सेवन गरेका युवाले सडक अवरोध गरी एम्बुलेन्स रोकेर आक्रमण गरेको चालक शर्माले बताए । आक्रमणबाट एम्बुलेन्स पछाडिको भाग र बडीमा क्षति पुगेको उनले जानकारी गराए । उनका अनुसार आक्रमण गरेपछि प्रहरीलाई फोन गरेको र घटनास्थलमा प्रहरी आउन नपाउँदै आक्रमणकारी फरार भएका थिए ।
आफूलाई कुटपिट गर्नुका साथै एम्बुलेन्स तोडफोड गरे पनि बिरामीलाई सकुशल नेपालगन्ज पुर्याएको उनले जानकारी गराए । बिरामी लिएर गइरहेका बेला आक्रमण गर्नेलाई कारबाहीका लागि उनले माग गरेका छन् ।
यता जिल्ला प्रहरी कार्यालय सल्यानका सूचना अधिकारी प्रहरी निरीक्षक पूर्णबहादुर केसीले घटना सुर्खेत जिल्लाको भए पनि घटनाबारेमा बुझ्दा मदिरा सेवन गरेका युवाले आक्रमण गरेको खुल्न आएको बताए । घटनाको थप अनुसन्धान भइरहेको उनले सुनाए ।
