: पूर्व–पश्चिम राजमार्गअन्तर्गत मोरङको सुन्दरहरैँचा नगरपालिकामा बिहीबार बिहान टिपरसँग स्कुटर ठोक्किएर दुर्घटना हुँदा एकजना किशोरको मृत्यु भएको छ । अर्का किशोर गम्भीर घाइते भएका छन् ।
मोरङ प्रहरीका सूचना अधिकारी डीएसपी लीलाराज लामिछानेका अनुसार सुन्दरहरैँचा–५ मा बाँसबारीमा बिहान १०:३० बजेतिर दुर्घटना भएको हो । पूर्वबाट पश्चिमतर्फ आउँदै गरेको प्रदेश २–०१–००१ ख ००३८ नम्बरको टिपर र पूर्वतर्फ जाँदै गरेको को २५ प ३४८४ नम्बरको स्कुटर एकआपसमा ठोक्किँदा सुन्दरहरैँचा–४ का १७ वर्षीय मौसम काफ्लेको मृत्यु भएको जानकारी लामिछानेले दिए ।
स्कुटरको पछाडि सवार रहेका काफ्ले दुर्घटनामा परेर गम्भीर घाइते भएका थिए । उपचारका लागि बूढीगंगा गाउँपालिकास्थित विराट शिक्षण अस्पताल पुर्याउनसाथ चिकित्सकले मृत घोषित गरिदिएको प्रहरीले जनाएको छ ।
दुर्घटनामा परेर स्कुटर चालक सुन्दरहरैँचा–५ का १६ वर्षीय अनुप चापागाईं गम्भीर घाइते भएको डीएसपी लामिछानेले बताए । उनको विराट शिक्षण अस्पतालमै उपचार भइरहेको छ । स्कुटर चालक चापागाईंसँग सवारी चालक अनुमति पत्र ९लाइसेन्स० भए–नभएको खुल्न बाँकी छ । उमेरका हिसाबले उनीसँग लाइसेन्स नभएको हुनसक्ने प्रहरीले जनाएको छ ।
टिपर र चालक सप्तरीको तिरहुत गाउँपालिका–२ का ५७ वर्षीय शिवनारायण खंगलाई प्रहरीले नियन्त्रणमा लिएको छ । इलाका प्रहरी कार्यलय बेलबारीका वरिष्ठ सई डम्बर थापा नेतृत्वको टोलीले बालुवा लोड गरिएको टिपर र चालकलाई नियन्त्रणमा लिएर अनुसन्धानको दायरामा ल्याएको हो ।
