— बाँकेको बैजनाथ गाउँपालिका–५ छमनियामा जग्गा प्रयोगको विषयमा विवाद हुँदा एक महिलाको हत्या भएको छ । मृतकको घरमा आगजनी समेत गरिएको छ ।
इलाका प्रहरी कार्यालय कोहलपुरका अनुसार मृत्यु हुनेमा बैजनाथ गाउँपालिका वडा–५ छमनियाकी ५५ वर्षीया भगवनी थारू रहेकी छन् । मंगलबार बिहान १० बजेतिर हँसिया प्रहारबाट ती महिलाको हत्या भएको हो। प्रहरी निरीक्षक तथा सूचना अधिकारी रामनारायण गुप्ताले हँसिया प्रहार भएकी थारूको घटनास्थलमै मृत्यु भएको बताए ।
उनका अनुसार हँसिया प्रहरी गरी महिलाको हत्यामा संलग्न रहेका सोही ठाउँका ५५ वर्षीय सिताराम थारू पक्राउ परेका छन् । थारूले नै मृतक भगवनीका छोरा ३५ वर्षीय अर्जुन थारूलाई समेत हँसिया प्रहार गरेर गम्भीर घाइते बनाएको उनले बताए । टाउकोमा गम्भीर चोट लागेका अर्जुनको अहिले उपचार भइरहेको छ ।
महिलाको हत्यामा संलग्न आरोपमा सितारामलाई पक्राउ गरेर अनुसन्धान भइरहेको इलाका प्रहरी कार्यालय कोहलपुरले जनाएको छ ।
कोहलपुर प्रहरीका अनुसार जग्गा विवादका कारण यस्तो घटना निम्तिएको हो । मृतक भगवनी र सिताराम छिमेकी हुन् । उनीहरूबीच केही समयदेखि घरनजिकै रहेको जग्गा प्रयोगको विषयमा विवाद हुँदै आएको थियो।
