— रूपन्देही प्रशासनले उपभोक्ताको बढी गुनासो आउने गरेको बुटवल उपमहानगरपालिका, तिलोत्तमा नगरपालिका र सैनामैना नगरपालिका क्षेत्रमा सरोकारवाला निकायहरूसहितको सहभागितामा संयुक्त अनुगमनलाई तीव्रता दिएको छ ।
इलाका प्रशासन कार्यालय बुटवलका प्रमुख श्रीनाथ पौडेलले उपभोक्ताले सहज रूपमा ग्यास नपाएको गुनासो आएपछि संयुक्त अनुगमन कार्यलाई तीव्र पारिएको बताए । उनका अनुसार सोमबारदेखि ग्यास अभावलाई मध्यनजर राख्दै संयुक्त बजार अनुगमन तीव्र बनाइएको हो । आइतबारयता बुटवल, तिलोत्तमा र सैनामैना नगर क्षेत्रमा साढे दुई दर्जन ग्यास बिक्रेतामाथि अनुगमन भइसकेको छ ।
अनुगमनमा उपभोक्ता हित संरक्षण मञ्च, स्थानीय उद्योग वाणिज्य संघ, व्यापार संगठन, व्यापार संघ, नगरपालिकाका प्रतिनिधि र सुरक्षाकर्मीसहितको टोली संयुक्त अनुगमनमा खटेको छ ।
टोलीले रूपन्देहीको पूर्व–पश्चिम राजमार्ग आसपासका क्षेत्रमा एक दर्जनभन्दा धेरै ग्यास बिक्रेताले बढी मुनाफा कमाउन खाना पकाउने ग्यास लुकाएर राखेको पाइएको जनाएको छ ।
अनुगमनमा सहभागी ग्यास विक्रेता संघ रूपन्देहीका अध्यक्ष प्रदीपप्रसाद पन्थले सैनामैना र बुटवल क्षेत्रका १७ वटा ग्यास डिलरमा अनुगमन गर्दा १५ वटामा लुकाइ छिपाइ राखिएका ६ सय जति ग्यास सिलिन्डर फेला परेको बताए ।
‘अनुगमनका क्रममा केही बिक्रेताले नियम विपरीत ग्यास सिलिण्डर लुकाएर वितरणमा असहज परिस्थिति बनाएको र केहीले बढी पैसा असुल्ने गरेको पाइएको छ,’ पन्थले भने, ‘बढी पैसा असुलेका केही ग्यास बिक्रेताबाट तत्कालै उपभोक्तालाई पैसा फिर्ता गराइएको छ ।’
उनका अनुसार जसमध्ये, सैनामैना नगरपालिकाको मुर्गियास्थित रानिबगियामा रहेको लाङ्घाली ग्यास सप्लायर्सले आधा सिलिन्डर ग्यासलाई १ हजार रुपैयाँ मूल्य कायम गरेर त्यसमाथि प्रतिसिलिन्डरमा ३ सय रुपैयाँ अतिरिक्त लिएर बिक्री गरेको अनुगमनका क्रममा पाइएको छ । प्रतिआधा सिलिन्डर ग्यासको मूल्य ९ सय ५५ रुपैयाँ छ ।
