— सुर्खेत गुर्भाकोट नगरपालिका–१२ पिप्लेकी ३८ वर्षीया माया कठायत र उनकी ११ वर्षीया छोरी आशाको शव भेरी नदी किनारमा फेला परेको छ । दुई जनाको शव भेटिए पनि सँगै रहेका ५ वर्षीय छोरा फेला परेका छैनन् ।
सोमबार बेलुका लेकबेसी नगरपालिका–३ पटारे भन्ने ठाँउमा मायाको शव भेटिएको थियो भने छोरीको शव गुर्भाकोट नगरपालिका–१२ स्थित भेरी किनारमा भेटिएको थियो ।
सम्पर्कविहीन भएकी मायाको चप्पल, झोला र मोबाइल नदी किनारमा भेटिएपछि स्थानीयले प्रहरीमा खबर गरेका थिए । घटनालगत्तै इलाका प्रहरी कार्यालय छिन्चुको टोली घटनास्थलमा पुगेको थियो । प्रहरीले खोजतलास गर्दा आमाछोरीको शव फेला पारे पनि छोराको अवस्था अझै अज्ञात रहेको जनाएको छ ।
प्रहरीको प्रारम्भिक अनुसन्धानबाट मायालाई श्रीमानले कुटपिट गर्ने गरेको खुल्न आएको छ । लामो समय भारतमा काम गर्दै आएका मायाका श्रीमान भुपेन्द्र कठायत ६ महिनायता अटो चलाउँदै आएका छन् । अटो चलाउन थालेदेखि माया र भुपेन्द्रबीच खटपट सुरु भएको प्रहरीको अनुसन्धानमा खुलेको प्रहरीको भनाइ छ ।
इलाका प्रहरी कार्यालय छिन्चुका प्रहरी प्रमुख प्रकाश केसीले मायाका माइती र घरपरिवारसँग भेटेर अनुसन्धान गरिरहेको बताए । ‘अहिलेसम्म छोरालाई फेला पार्न सकिएको छैन, कतैबाट जाहेरी पनि आएको छैन,’ उनले भने, ‘हामीले श्रीमानलाई निगरानीमा राखेका छौं । घटनाको प्रकृति हेर्दा घरेलु हिंसाजस्तो नै देखिन्छ । नेपाल प्रहरी र सशस्त्र प्रहरीको सहयोगमा बलकको खोजी जारी छ ।’
