: राष्ट्रिय स्वतन्त्र पार्टी (रास्वपा)ले एकल सरकार बनाउने तयारी गरिरहेका बेला चिनियाँ कम्युनिस्ट पार्टी (सीपीसी)को उच्च स्तरीय टोली काठमाडौं आइपुगेको छ। सीपीसीको अन्तर्राष्ट्रिय विभागबाट नेपाल हेर्ने अधिकारी चङ योया नेतृत्वको चार सदस्यीय टोली मंगलबार काठमाडौं आइपुगेको छ। यही टोली गत माघ ८ गते पनि काठमाडौं आएको थियो।
एयर चाइनाको जहाजबाट छेन्दु हुँदै उच्चस्तरीय चिनियाँ टोली काठमाडौं ओर्लिएको हो। चङ योया नेतृत्वकै तीन सदस्यीय टोली फागुन २१ को निर्वाचनअघि काठमाडौं आएर निर्वाचनको परिस्थिति मूल्यांकन गरेको थियो। उनी नेतृत्वकै टोली निर्वाचनको मतपरिणामसँगै काठमाडौं आएको हो।
अमेरिकी सेनाको उच्च स्तरीय टोली भ्रमण सकाएर फर्किएकै दिन चिनियाँ उच्च स्तरीय टोलीसमेत काठमाडौं आइपुगेको स्रोतले बताएको छ। काठमाडौं आएलगत्तै उक्त टोलीले राजनीतिक भेटघाट सुरु गरेको स्रोतले दाबी गरेको छ। काठमाडौं बसाइकै क्रममा उक्त चिनियाँ टोलीले सरकार निर्माणको प्रक्रिया, नयाँ सरकारले चीनलाई हेर्ने दृष्टिकोण र चिनियाँ परियोजनाहरूको कार्यान्वयनको विषयमा बुझ्ने प्रयास गर्नेछ।
चिनियाँ परियोजना बीआरआई कार्यान्वयन गर्नेबारे दुई मुलुकबीच हस्ताक्षर भए पनि उक्त परियोजना अपेक्षाकृत अघि बढ्न सकेको छैन। उक्त चिनियाँ टोली नेपाल बसाइका क्रममा रास्वपाका वरिष्ठ नेता बालेन्द्र शाहसँग भेट्ने प्रयास गर्नेछ। साथै, उक्त टोलीले रास्वपाका सभापति रवि लामिछाने, अन्तर्राष्ट्रिय विभाग प्रमुख शिशिर खनाललगायत उच्च स्तरीय टोलीसँग भेट गर्ने स्रोतले बताएको छ। सो टोलीले नेपाली कम्युनिस्ट पार्टीका संयोजक पुष्पकमल दाहाल 'प्रचण्ड' र नेकपाका एमालेका नेताहरूसँग पनि छलफल गर्ने बताइएको छ।
चीनले परिवर्तित राजनीतिक अवस्थामा राष्ट्रिय स्वतन्त्र पार्टीसँग मिलेर अघि बढ्ने संकेत देखाएको छ। सीपीसीले रास्वपालाई शुभकामना सन्देश पठाएर नयाँ सरकारसँग चीनले मैत्रीपूर्ण सम्बन्ध कायम राख्ने र सहकार्यलाई गहिरो बनाउने बताएको छ।
सीपीसीको अन्तर्राष्ट्रिय विभागले पठाएको पत्रमा भनिएको छ, 'दुई देशबीचको सम्बन्धलाई थप सुदृढ पार्दै आपसी सिकाइलाई गहिरो बनाउन तयार छौं। यसले द्विपक्षीय सम्बन्धको निरन्तर, सुदृढ र स्थिर विकास प्रवर्द्धन गर्न हामी संयुक्त रूपमा सक्रिय भूमिका निर्वाह गर्न सकौं।'
सीपीसीले रास्वपा सभापति रवि लामिछाने र भावी प्रधानमन्त्री बालेन्द्र शाहको प्रशंसा गरेको छ। उसले रास्वपाबाट पनि सहकार्यको अपेक्षा गरेको छ। 'रास्वपाले चीनसँगको मैत्री सम्बन्धलाई निरन्तरता दिँदै परम्परागत मित्रतालाई अगाडि बढाउन तथा विभिन्न क्षेत्रमा आदानप्रदान र सहकार्यलाई गहिरो बनाउँछ भन्ने विश्वास लिएका छौं,' शुभकामना सन्देशमा भनिएको छ।
सीपीसीले नेपालसँग भएको बीआरआईलगायत महत्त्वपूर्ण सम्झौताहरू रास्वपाले कार्यान्वयन गर्नेमा पनि विश्वस्त देखिएको छ। उसले भनेको छ, 'पहाड र नदीहरूले जोडिएका चीन र नेपालबीच दीर्घकालीन मित्रता छ। नयाँ परिस्थितिमा, चीन नेपालसँग सहकार्य गर्दै राजनीतिक पारस्परिक विश्वासलाई अझ गहिरो बनाउन, बेल्ट एन्ड रोड सहकार्यलाई प्रवर्द्धन गर्न तत्पर छ।'
जवाफमा रास्वपाका विदेश विभाग प्रमुख शिशिर खनालले दुई देशको सम्बन्धलाई अझ प्रगाढ बनाइने बताएका छन्। उनले विज्ञप्ति जारी गर्दै भनेका छन्, 'चिनियाँ कम्युनिस्ट पार्टीले रास्वपासँगको बढ्दो सम्बन्ध र सहकार्यप्रति खुसी व्यक्त गर्दै आगामी दिनमा दुई राजनीतिक शक्तिबीचको सम्बन्ध अझ प्रगाढ हुने विश्वास दिलाएको छ। चिनियाँ कम्युनिस्ट पार्टीले रास्वपासँग विभिन्न क्षेत्रमा अनुभव आदानप्रदान, आपसी सिकाइ र द्विपक्षीय सम्बन्धको स्थिर विकासका लागि सँगै काम गर्ने तत्परता देखाएको छ। रास्वपा नेपालको स्वतन्त्र परराष्ट्र नीति र पञ्चशीलको सिद्धान्तमा अडिग रहँदै छिमेकी मुलुकहरूसँगको सम्बन्धलाई सधैँ प्राथमिकतामा राख्दछ। चिनियाँ कम्युनिस्ट पार्टीले व्यक्त गरेको यस शुभेच्छा र ऐक्यबद्धताका लागि हामी हार्दिक धन्यवाद ज्ञापन गर्दछौं,' खनालद्वारा जारी गरेको विज्ञप्तिमा भनिएको छ।
