: अख्तियार दुरुपयोग अनुसन्धान आयोगले घुस लिने र दिने दुवैजनाविरुद्ध भ्रष्टाचार मुद्दा दायर गरेको छ। आयोगले रुकुम पश्चिमको चौरजहारी नगरपालिकाका प्रमुख पुष्प वादी र असिस्टेन्ट सब–इन्जिनियर मोहन शाहविरुद्ध घुस/रिसवतसम्बन्धी कसुरमा मंगलबार विशेष अदालतमा मुद्दा दायर गरेको हो।
आयोगका प्रवक्ता सुरेश न्यौपानेले दुवैजनाले घुस लिएको र दिएको पुष्टि हुन आएपछि आज विशेष अदालत काठमाडौंमा आरोप- पत्र दायर गरेको जानकारी दिए।
आयोगका अनुसार शाह विगत ८ वर्षदेखि चौरजहारी नगरपालिकामा असिस्टेन्ट सब–इन्जिनियरका रूपमा करार सेवामा कार्यरत थिए। उनले सेवा करारको म्याद थप तथा निरन्तरताका लागि नगर प्रमुख वादीले एक लाख रुपैयाँ मागेको र उक्त रकम दिन नसकिने बताएपछि करार नवीकरण नभएको उजुरी दिएका थिए।
उजुरीमा उल्लेख भएअनुसार आर्थिक वर्ष २०८१/८२ का लागि म्याद थप गर्दा नगर प्रमुखले रकम मागेका थिए। रकम बुझाएपछि मात्रै उनको करार नवीकरण गरिएको थियो। तर आर्थिक वर्ष २०८२/८३ का लागि पुनः एक लाख रुपैयाँ माग्दा नगद उपलब्ध गराउन नसक्ने बताएपछि उनको करार नवीकरण नगरी सेवाबाट हटाइएको पनि उजुरीमा उल्लेख छ। उनले पहिलो पटक रकम जम्मा गरेको बैंक भौचरसमेत प्रमाणका रूपमा पेश गरेका थिए।
अनुसन्धानका क्रममा नगर प्रमुख वादीले आफ्नो पदको दुरुपयोग गर्दै करार नवीकरण गराइदिने नाममा एक लाख रुपैयाँ घुस लिएको पुष्टि भएको आयोगले जनाएको छ। उक्त कार्य भ्रष्टाचार निवारण ऐने २०५९ को दफा ३ अन्तर्गतको कसूर ठहर गरिएको छ।
यसैगरी, आयोगले शाहले पनि आफ्नो करार अवधि थप गराउन नगर प्रमुखलाई मोलाहिजा गरी २०८० साउन ८ गते (२४ जुलाई २०२३) वादीको बैंक खातामा १ लाख रुपैयाँ जम्मा गरेको प्रमाण फेला परेको जनाएको छ। यस आधारमा उनीमाथि पनि घुस दिने कसुर स्थापित भएको आयोगको निष्कर्ष छ।
आयोगले नगर प्रमुख वादीविरुद्ध १ लाख रुपैयाँ बिगो कायम गरी कैद,जरिवाना तथा घुस रकम जफतको माग गरेको छ। साथै सार्वजनिक पदमा बहाल रहेको अवस्थामा कसुर गरेको भन्दै थप सजायसमेत मागदाबी गरिएको छ।
त्यस्तै, शाहविरुद्ध पनि बिगो बराबरको जरिवाना,कैद सजाय र दिएको घुस रकम जफत गर्न माग गर्दै सोही ऐनअनुसार कारबाहीको माग गरिएको आयोगले जनाएको छ।
