: दुबई अन्तर्राष्ट्रिय विमानस्थलबाट हुने उडानहरू क्रमिक रूपमा पुनः सुचारु भएका छन्। गएराति विमानस्थल नजिकै ड्रोन आक्रमण भएपछि इन्धन ट्याङ्कीमा आगो लाग्दा अस्थायी रूपमा उडानहरु स्थगित गरिएका थिए । सोही उडानहरू अहिले केही निश्चित गन्तव्यका लागि खुला गरिएको दुबई नागरिक उड्डयन प्राधिकरणले जनाएको छ।
प्राधिकरणका अनुसार विमानस्थलको एक इन्धन ट्याङ्कीमा आगो लागेपछि सुरक्षा सावधानीका रूपमा उडानहरू रोक्नु परेको थियो। उक्त घटनामा कुनै पनि मानवीय क्षति नभएको पुष्टि गरिएको छ।
उड्डयन प्राधिकरणले सामाजिक सञ्जाल 'एक्स' मार्फत जानकारी दिँदै सावधानीका उपायहरू अपनाएपछि अब केही उडानहरू सञ्चालनमा आउने बताएको छ। विमानस्थल प्रशासनले यात्रुहरूलाई आफ्नो उडानको पछिल्लो अवस्थाबारे सम्बन्धित एयरलाइन्ससँग सम्पर्क गर्न सुझाव दिएको छ।
