: प्रधान सेनापति अशोकराज सिग्देल र अमेरिकी सेनाको प्यासिफिक कमाण्डका उपप्रमुख लेफ्टिनेन्ट जनरल जोएल भोवेलबीच भेटवार्ता भएको छ। सैनिक मुख्यालय जङ्गीअड्डामा सोमबार उनीहरूबीच भेटवार्ता भएको हो। उनीहरूबीच दुईपक्षीय हित तथा पारस्परिक सम्बन्धका विषयमा छलफल भएको सैनिक मुख्यालयले जनाएको छ।
स्रोतका अनुसार भेटमा सैनिक सहायता ,सैन्य तालिमलगायत विषयमा छलफल भएको हो। भोवेलले परिवर्तित राजनीतिक परिस्थिति र भू-राजनीतिक अवस्थाका बारेमा चासो राखेको उच्च सैनिक स्रोतले जनाएको छ।
उनीहरूबीच अमेरिकाले नेपाली सेनालाई दिँदै आएको सैन्य सहायता र तालिमको निरन्तरताका बारेमा छलफल भएको छ। जनरल भोवेल आइतबार बिहान ड्रुक एयरको जहाजमार्फत् चार सदस्यीय टोलीको नेतृत्व गर्दै भुटानबाट काठमाडौं आएका थिए।
नेपाली सेनाले भोवेलको नेपाल भ्रमणलाई नियमित भनेको छ। बिहीबार नयाँ दिल्लीमा भारतीय प्रधानसेनापति उपेन्द्र द्विवेदीसँग भेटवार्ता गरेका उनी भुटान गएका थिए।
भोवेल फागुन २१ को प्रतिनिधि सभाको निर्वाचनपछि नेपाल आउने सबैभन्दा उच्च पदस्थ अमेरिकी सेनाका अधिकारी हुन् । यसअघि पनि फागुन १ गते अमेरिकी इन्डो–प्यासिफिक कमाण्डका जनरल सामुयल जे. पापारो नेपाल आएका थिए।
भोवेलको टोली भोलि थाइल्याण्डतर्फ जाने जनाइएको छ।
