— जनमत पार्टीका अध्यक्ष सीके राउतले संसदीय राजनीतिबाट अवकाश लिने घोषणा गरेका छन् ।
'यसपालिको निर्वाचनमा जिते पनि हारे पनि संसदीय राजनीतिबाट अवकाश लिन्छु भन्ने सोचेको थिएँ । यसको अर्थ पार्टीलाई अलपत्र पार्छु भन्ने होइन । आगामी निर्वाचनहरुमा पार्टीबाट तयारी गरे पनि म भने संसदीय चुनाव लड्दिनँ,' प्राइम टीभीको कार्यक्रम 'जनता जान्न चाहन्छन्' सँगको अन्तर्वार्तामा उनले भनेका छन् ।
संसद्मा आफ्नो ठूलो उपयोगिता नरहेको पनि उनको भनाइ छ । अब संसदीय राजनीतिमा भाग नलिने र कुनै निर्वाचनमा प्रतिपर्धा नहुने उनले खुलासा गरे ।
२०७९ को निर्वाचनमा पनि आफूमा उम्मेदवार बन्ने चाहना नरहेको उनको भनाइ छ । 'साथीहरुले भक्तपुरमा बसेर समानुपातिक सूची बनाइरहेका थिए । मलाई समानुपातिक वा प्रत्यक्षमा पनि उम्मेदवार नबनाउनु भनेको थिएँ,' उनले सुनाए, 'उहाँहरुले तपाईंले चुनाव नलडे मनोबल गिर्छ, एउटा पनि सिट जितिएन भने के गर्ने भनेर कन्भिन्स गराए । यसरी नचाहँदा नचाहँदै लडेँ ।'
अहिलेको परिणामले आफू दु:खी नभएको उनको जिकिर छ । 'यसपालि पनि म निर्वाचन नलड्ने सोचमा नै थिएँ । पराजित हुन्छु भन्ने धेरै हदसम्म थाहा थियो,' उनले भने, 'चुनाव नलडेको भए मधेशवादी दल सबै पराजित भएको दोष मलाई पनि आउँथ्यो । तर लडेर ठिकै गरेछु भन्ने लागेको छ ।'
