: आर्थिक वर्ष २०८२/८३ को फागुन मसान्तसम्म सरकारको राजस्व संकलन लक्ष्यको तुलनामा निकै सुस्त देखिएको छ। मन्त्रालयको विवरणअनुसार फागुनसम्म ९ खर्ब १० अर्ब रुपैयाँ संकलन गर्ने संशोधित लक्ष्य तोकिएको भए तापनि वास्तविक संकलन निकै कम रहेको छ।
फागुन मसान्तसम्म ९ खर्ब १० अर्ब राजस्व संकलन गर्ने लक्ष्य राखिएकामा ७ खर्ब ५१ अर्ब रुपैयाँ मात्र संकलन भएको छ । यो लक्ष्यको ८२.६० प्रतिशत हो। फागुनको मात्र लक्ष्य भने ९६ अर्ब ५७ करोड रहेकामा संकलन ८२ अर्ब ५३ करोड रहेको छ, जुन लक्ष्यको ८५.४६ प्रतिशत हो। चालु आर्थिक वर्षको वार्षिक लक्ष्य १४ खर्ब ८० अर्ब रुपैयाँ रहेको छ।
फागुन मसान्तसम्म ९ खर्ब १० अर्ब राजस्व संकलन गर्ने लक्ष्य राखिएकोमा ७ खर्ब ५१ अर्ब रुपैयाँ मात्र संकलन
फागुन महिनाको लक्ष्य ९६ अर्ब ५७ करोड रहेकोमा संकलन ८२ अर्ब ५३ करोड
क्षेत्रगत रूपमा हेर्दा भन्सार महसुलतर्फ वार्षिक लक्ष्यको ५१.०२ प्रतिशत र मूल्य अभिवृद्धि कर (भ्याट)तर्फ ५७.१६ प्रतिशत प्रगति भएको छ।
अन्तःशुल्क संकलन लक्ष्यको ५६.४७ प्रतिशत रहँदा आयकरको अवस्था भने निकै कमजोर देखिएको छ, जहाँ वार्षिक लक्ष्यको ४१.९६ प्रतिशत मात्र संकलन हुन सकेको छ। विभागगत रूपमा भन्सार विभागले आफ्नो लक्ष्यको ५४.३९ प्रतिशत र आन्तरिक राजस्व विभागले ४८.३७ प्रतिशत राजस्व उठाएका छन्।
गत आर्थिक वर्षको सोही अवधिको तुलनामा कुल राजस्वमा ३.०४ प्रतिशतको झिनो वृद्धि देखिए तापनि गैर–कर राजस्वमा भने १३.२१ प्रतिशतको गिरावट आएको छ। आर्थिक वर्ष सकिन ४ महिना मात्र बाँकी हुँदा सरकारलाई राजस्व संकलनको चाप पर्ने देखिएको छ।
