: इरानले गए राती खाडी क्षेत्रका विभिन्न देशहरूमा मिसाइल र ड्रोनमार्फत व्यापक आक्रमण गरेको छ। साउदी रक्षा मन्त्रालयले रातभरमा आफ्नो आकाशमा २६ वटा इरानी ड्रोन खसालेको घोषणा गरेको छ। यी ड्रोनहरू मुख्यतया राजधानी रियाद र देशको पूर्वी क्षेत्रहरूलाई लक्षित गरी पठाइएका थिए।
बिबिसीका अनुसार आइतबार बिहान करिब ३:३० बजे युईएले इरानबाट आएका मिसाइल र ड्रोन आक्रमणको प्रतिकार गरिरहेको जनाएको छ। यसअघि शनिबार फुजैराह बन्दरगाहमा रहेको तेल निर्यात टर्मिनलमा ड्रोन आक्रमण भएपछि त्यहाँ भीषण आगलागी भएको थियो।
सोही समयमा बहराइनले देशभर खतराको साइरन बजाएको छ र आफ्ना नागरिकहरूलाई तुरुन्तै नजिकैको सुरक्षित आश्रयस्थलमा जान आग्रह गरेको छ। यता सुरक्षा चिन्ताको कारण देखाउँदै अमेरिकाले ओमानमा रहेका आफ्ना गैर-अत्यावश्यक सरकारी कर्मचारी र उनीहरूका परिवारलाई देश छोड्न आदेश दिएको छ। यस्तै कुवेतले पनि २४ घण्टामा आफ्नो आकाशमा ५ वटा इरानी ड्रोन खसालेको जानकारी दिएको छ ।
कतारले शनिबार दिनभर भएका मिसाइल र ड्रोन आक्रमणहरूलाई सफलतापूर्वक रोकेको बताएको छ, यद्यपि रातभरमा नयाँ आक्रमणको कुनै रिपोर्ट आएको छैन।
