— प्रधानमन्त्री सुशीला कार्कीले छोटो अवधिमा निकै कठिनाइ भोगेर निर्वाचन सम्पन्न गराएको बताएकी छन् । राष्ट्रिय समाचार समितिकी समाचारदाता कालिका खड्कालाई दिएको अन्तर्वार्तामा उनले 'तपाईं प्रधानमन्त्री भए पनि राजनीतिक दलको मन्त्री राखेर सरकार चलाउनु' भनेर राजनीतिक दलबाट दबाबसमेत आएको खुलाइन् ।

'एकदुई जनाले त यसलाई असफल बनाएर आफैं प्रधानमन्त्री बन्छु पनि भने । जेनजीका २१/२२ वटा समूह निस्किए । एउटाले एउटा भन्छ, अर्काले अर्को । पार्टीको भ्रातृ संगठनजस्तो भयो जेनजी त,' उनले भनिन्, 'कोहीले कार्यकारी प्रधानमन्त्री, कोहीले निर्वाचित प्रधानमन्त्री र केहीले संविधान संशोधन गर्न भने । संविधानले गर्न नमिल्ने कुरा पनि भनिरहेका हुन्थे । जेनजीहरुले भनेको कुरालाई नसुनेझैं गर्न पनि भएन । राजनीतिक दल भन्छन्– यो सरकारले निर्वाचन मात्रै गराउने हो । जेनजी भन्छन्– सबै काम गर, यो त विद्रोहबाट आएको सरकार हो । हामी त तावामा फुलौरा उफ्रिएजस्तो भयौं ।'

एउटा अनिश्चयकाबीच शान्तिपूर्ण तरिकाले निर्वाचन सम्पन्न गराएकामा निकै खुसी लागेको प्रधानमन्त्री कार्कीको भनाइ छ । 'सरकारलाई जुन जिम्मेवारी तोकेर दिइएको थियो । त्यो हामीले समयमै पूरा गर्न सक्यौं । आनन्दजस्तो महसुस भएको छ,' उनले भनिन् ।

६ महिनाबीच धेरैले अविश्वास गरेको भन्दै उनले आफूहरुविरुद्ध सिंगै पुराना दल उभिएको सुनाइन् । 'जेनजी हुँ भन्नेहरुले तुरुन्तै छोड पनि भने । जेनजीको आन्दोलनलाई अपहरण गरेर आयौ भने । त्यसबेला हामीलाई सहयोग गर्ने मान्छे एकदम कम थिए,' उनले भनिन्, 'विदेशी कूटनीतिक नियोगका प्रतिनिधिसँग भेट्दा पनि ‘सम्भव छ र ?’ भन्ने जस्ता प्रश्न आउँथे । हामी सीमित मान्छे सरकारमा थियौं । त्यो बीचमा धेरै हमला भयो । हामीप्रति मानिसको विश्वास पनि थिएन । त्यसमाथि एउटा महिला भन्ने खालका टिप्पणी सुनिँदै थिए । तर मैले एक कानबाट सुनेँ, अर्को कानबाट उडाइदिएँ । आफ्नो काम छोडिनँ ।'

जेन-जी सहिदका बुबाआमा बालुवाटार आएर रोएको दिन आफूलाई हृदयाघात नै होलाजस्तो भएको उनले बताइन् ।

राष्ट्रिय अनुसन्धान विभाग प्रधानमन्त्री मातहत राखेर निकम्मा बनाइएको भन्दै उनले अहिले त्यसलाई गृह मन्त्रालय मातहत राखेर क्रियाशील गराइएको बताइन् । 'यो निर्वाचन सम्पन्न गर्न र धेरै ठूला दुर्घटना टार्न अनुसन्धान विभागको सूचनाले महवपूर्ण काम गरेको छ,' उनले भनिन् ।

अहिलेको निर्वाचन परिणामलाई जेन-जी आन्दोलनको असर र परिर्वतनको चाहना रहेको उनको बुझाइ छ । 'दलले पनि आत्तिनुपर्दैन । नयाँले मात्तिनु पर्दैन । हामीले पनि नसोचेको भयो । मैले त ओली जी हार्नुहोला भन्ने सोचेको पनि थिइनँ,' उनले भनिन्, 'रास्वपाले पाएको मतको सम्मान गर्नुपर्छ । विपक्षीले थोरै मत पाएको भए पनि रास्वपाले त्यसलाई सम्मान गर्नुपर्छ । पुराना पार्टीलाई रास्वपाले सम्मान गर्नुपर्छ । सत्तापक्षले गलत गरेमा प्रतिपक्षले विरोध गर्नुपर्छ ।'

भदौ २३ र २४ गतेको घटनाको छानबिन गर्न गठित जाँचबुझ आयोगको प्रतिवेदनबारे उनले आज बस्ने मन्त्रिपरिषद्को बैठकले निर्णय लिने बताइन् । 'अब हामीसँग धेरै समय पनि छैन । नयाँ जनादेश आइसकेको छ । नयाँ सरकारले पनि बाँकी प्रक्रिया अवश्य अघि बढाउनेछ ।'

नयाँ सरकारले सबैभन्दा पहिला जेनजीले राखेका तीन वटा माग पूरा गर्नुपपर्ने उनले सुझाइन् । 'सुशासन कायम, भ्रष्टाचार नियन्त्रण र रोजगारीको व्यवस्था । सबैभन्दा ठूलो समस्या रोजगारीको अभाव छ । भएका अवसरमा पनि नातावाद छ । यस्तो अवस्था हटाउँदै आर्थिक स्थितिमा सुधार गर्नुपर्छ,' उनले भनिन्, 'खुलेआम भ्रष्टाचार रोख्नुपर्छ । सबैभन्दा ठूलो सुधार सिंहदरबारभित्र गर्नुपर्ने मैले देखेको छु । त्यहाँ काम गर्ने कर्मचारीहरु राजनीतिकरण हुने गरेको देखियो । हरेक कामलाई सचिवहरू फनफनी घुमाइरहँदा रहेछन् ।'