— वीरेन्द्रनगर नगरपालिका-१ की १६ वर्षीया इनिसा विकको शव एक सातादेखि कर्णाली प्रदेश अस्पतालको शव गृहमा राखिएको छ । पीडित परिवारले छोरीमाथि बलात्कारपछि हत्या गर्ने दोषीलाई कानुनबमोजिम कारबाही नभएसम्म शव नबुझ्ने अडान लिएका छन् ।
परिवारले बलात्कारको आरोपमा पक्राउ परेका चार जनाविरुद्ध कर्तव्य ज्यान तथा जबर्जस्ती करणीसम्बन्धी किटानी जाहेरी दर्ता गराएका छन् । परिवारको जाहेरीपछि बाँकेको भेरी अस्पतालका फरेन्सिक विशेषज्ञ डा. अर्विन शाक्य नेतृत्वको टोलीले कर्णाली प्रदेश अस्पताल पुगेर इनिसाको शव परीक्षण गरेको थियो । परीक्षण प्रतिवेदनमा बलपूर्वक करणीका क्रममा संवेदनशील अंगमा गम्भीर चोट लागि अत्यधिक रक्तस्राव हुँदा मृत्यु भएको उल्लेख छ ।
घटना भएको एक सातासम्म पनि वास्तविक तथ्य सार्वजनिक नभएको भन्दै परिवारले शव बुझ्न अस्वीकार गरेका छन् । लामो समय बितिसक्दा पनि प्रहरीले विश्वस्त हुने आधार प्रस्तुत गर्न नसकेको उनीहरूको आरोप छ ।
इनिसा मृत्यु प्रकरणमा न्यायको माग गर्दै नागरिक समाज र अधिकारकर्मीहरूले संघीय राजधानी काठमाडौंसम्म आवाज उठाइरहेका छन् । उनीहरूले घटनाको निष्पक्ष छानबिन गरी दोषीलाई कडा कारबाही गर्न माग गरेका छन् ।
पोस्टमार्टम रिपोर्टमा बलपूर्वक शारीरिक सम्बन्धपछि अत्यधिक रक्तस्रावका कारण मृत्यु भएको उल्लेख छ । घटनास्थलबाट पक्राउ परेका युवकले इनिसासँग शारीरिक सम्बन्ध राखेपछि अत्यधिक रक्तस्रावका कारण अचेत भएको बयान दिएका छन् । उनले इनिसा अचेत भएर ढलेपछि आत्तिएर अन्य तीन जना साथीलाई फोन गरेर घटनास्थलमा बोलाएको प्रारम्भिक अनुसन्धानबाट खुलेको छ । घटनाको गहिरो अनुसन्धानका लागि नेपाल प्रहरी केन्द्रीय अनुसन्धान ब्युरोले जिल्ला प्रहरी कार्यालय सुर्खेतसँग मिलेर अनुसन्धान गरिरहेको छ ।
जिल्ला प्रहरी कार्यालय सुर्खेतका प्रवक्ता प्रहरी नायब उपरीक्षक मोहनजंग बुढथापाका अनुसार छुट्टै अनुसन्धान कक्ष स्थापना गरेर सीआईबीसँग समन्वयमा अनुसन्धान भइरहेको छ । इनिसाको भ्याजाइनल स्वाबलगायतका प्रमाणहरू केन्द्रीय विधिविज्ञान प्रयोगशालामा टक्सिकोलोजिकल र बायोसेरोलोजिकल परीक्षणका लागि पठाइएको छ । ती रिपोर्ट आएपछि मात्रै घटनाको वास्तविकता थप स्पष्ट हुने उनले बताए ।
