— कैलाश गाउँपालिकाको केन्द्रलाई राजमार्गसँग जोड्ने सडकमा चार दशकपछि कालोपत्र गर्ने कार्य सुरु भएको छ ।
मकवानपुरको दुर्गम कैलाश गाउँपालिका जोड्ने सडक पहिलोपटक कालोपत्र गर्ने काम सुरु गरिएको हो । चेपाङ समुदायको बाहुल्य रहेको यो गाउँपालिकाको सडक ट्रयाक खुलेको ४३ वर्षपछि कालोपत्र हुन लागेको हो ।
संघ, प्रदेश र स्थानीय सरकारको संयुक्त प्रयासमा अहिले कैलाशमा सडक विस्तार र स्तरोन्नतिको कार्य अघि बढेको हो । त्रिभुवन राजपथको चुनियादेखि कैलाश गाउँपालिकाको केन्द्र कालिकाटारसम्म २१ किलोमिटर दूरीमा पर्छ ।
२०३९ सालमा ट्रयाक खन्ने कार्य सुरु भएको यो सडक पहिलोपटक स्तरीकरण र कालोपत्र गर्न लागिएको हो । संघीय सरकारको ५ करोडको लगानीमा चुनियादेखि नामटार बजारसम्म ५ किलोमिटर कालोपत्र गर्ने भइरहेको पालिकाका प्राविधिक सुशान्त नेपालीले बताए ।
नामटार बजारबाट पालिकाको केन्द्र रहेको कालिकाटारसम्मको सडकको स्तरोन्नति गर्ने कार्य भइरहेको छ । प्रदेश सरकारको १८ करोड रुपैयाँको लगानीमा निर्माण भइरहेको ७ किलोमिटर लामो भाल्टार–वनझाँक्री सडकखण्डको स्तरीकरण अन्तिम चरणमा पुगेको गाउँपालिका अध्यक्ष लोकबहादुर मोक्तानले जानकारी दिए।
विगतमा तत्कालीन जिल्ला विकास समितिमार्फत संचालित कामका लागि खाद्यान्न कार्यक्रम अन्तर्गत उक्त सडक निर्माण गरिएको थियो । सुरुको सर्भे नै गलत स्थानबाट भएकाले सडक निर्माण सम्पन्न गर्न प्राविधिक ढंगले नै समस्या आएको प्राविधिकहरुको भनाई छ ।
भैंसे र नामटार गाविसको वर्सेनि पहिरो जाने डाँडाको काखमा निर्माण गरिएको उक्त सडकको निर्माण कार्यमा हजारौं स्थानीयले श्रमदान पनि गरेका थिए । केही वर्षयता स्थानीय, प्रदेश र संघीय सरकारले यो सडकको निम्ति बजेट विनियोजन गरेको र प्राविधिक त्रुटि पनि सच्याएर सडक कालोपत्र भइरहेको हो ।
