: अमेरिकाले इरानको 'मुटु' मानिने खार्ग टापुमा आक्रमण गरेपछि इरानले अमेरिकी सहयोगी तेल कम्पनीहरूलाई निशाना बनाउने चेतावनी दिएको छ।
इरानले आफ्नो तेल र ऊर्जा पूर्वाधारमा आक्रमण भएमा अमेरिकी सहयोगी तेल कम्पनीहरूलाई निशाना बनाउने चेतावनी दिएको हो। इरानी सञ्चारमाध्यमका अनुसार यो चेतावनी अमेरिकी राष्ट्रपति डोनाल्ड ट्रम्पले तेल निर्यातका लागि मेरुदण्ड मानिने 'खार्ग टापु' का सबै सैन्य अखडालाई पूर्ण रूपमा ध्वस्त पारेको दाबी गरेपछि आएको हो।
ट्रम्पले सामाजिक सञ्जाल एक्समार्फत भनेका थिए, 'केही समयअघि, मेरो निर्देशनमा अमेरिकी केन्द्रीय कमान्डले मध्यपूर्वको इतिहासमै सबैभन्दा शक्तिशाली बमबारी गरेको छ। हामीले इरानको 'क्राउन ज्वेल' (शिरको रत्न) मानिने खार्ग टापुका सबै सैन्य लक्ष्यहरूलाई पूर्ण रूपमा ध्वस्त पारेका छौँ। हाम्रा हतियारहरू संसारले अहिलेसम्म थाहा पाएका मध्ये सबैभन्दा शक्तिशाली र परिष्कृत छन्, तर नैतिकताका कारण मैले अहिले नै त्यहाँको तेल पूर्वाधारलाई नष्ट नगर्ने निर्णय गरेको छु।'
ट्रम्पको दाबी पछि इरान आक्रोशित बनेको छ। यो टापु इरानको कच्चा तेल निर्यातको सबैभन्दा ठूलो र प्रमुख केन्द्र हो।
इरानी सेनाले चेतावनी दिँदै भनेको छ- 'यदि हाम्रो तेल र ऊर्जा पूर्वाधारमा थप हमला गरियो भने, हामी यस क्षेत्रमा अमेरिकासँग सहयोग गर्ने सबै तेल कम्पनीहरूका पूर्वाधारलाई निशाना बनाउनेछौँ।' यदि इरानी ऊर्जा क्षेत्रमा क्षति पुर्याइयो भने अमेरिकासँग मिलेर काम गर्ने अन्य देशका तेल कम्पनीहरू पनि सुरक्षित नरहने इरानकाे भनाई छ ।
यसैबीच, सुरक्षा जोखिमलाई मध्यनजर गर्दै अमेरिकी विदेश मन्त्रालयले ओमानमा रहेका आफ्ना गैर-अत्यावश्यक कर्मचारी र उनीहरूका परिवारलाई 'तत्काल देश छोड्न' आदेश दिएको छ। यस सँगै विश्व बजारमा कच्चा तेलको मूल्य बढ्न सक्ने र ऊर्जा संकट निम्तिने खतरा बढेको छ।
