— सामान्य वर्षा हुनासाथ आएको बाढीले फेमे खोलाको डाइभर्सन बगाउँदा फिदिम फालौट सडक खण्डमा यातायात र ढुवानीका साधन आउजाउ बन्द भएको छ ।
बिहीबार साँझ पानी पर्नासाथ आएको बाढीले डाइभर्सनका लागि राखिएका हृयुम पाइप बगाएको थियो।
हृयुमपाइप एकसय मिटर तलसम्म बगाएर लगेकाले सवारी र ढुवानीका साधन आउजाउ ठप्प भएको जिल्ला प्रहरी कार्यालय पाँचथरले जनाएको छ ।
सदरमुकाम फिदिमदेखि,नांगीन, याङनाम,सिदिन र प्राङवुङ हुँदै भारतसँगको सिमावर्ती फालौट र चारराते क्षेत्रलाई जोड्ने यो सडक जिल्लाका महत्वपूर्ण मध्ये एक हो ।
फेमेखोलामा सबैभन्दा पहिले २०८१ असोज १२ गते आएको बाढीले पक्की पुल बगाइदिएको थियो । त्यसपछि यो खोलाको यातायात डाइभर्सनका भरमा छ । गत वर्ष पटक पटक डाइभर्सन बग्दा सवारी सडक अवरुद्व भएको थियो ।
यहाँ प्रदेश सरकारले बेलिब्रिज निर्माण गरिरहेको छ । यद्यपि, काम पुरा भने भएको छैन ।
क्षतिग्रस्त डाइर्सन मर्मत गरेर सडक खुलाउन पूर्वाधार बिकास कार्यालय पाँचथरले बिहानैदेखि प्रयास गरिरहेको छ ।
मध्यान्हसम्म काम सक्ने गरी उपकरण र जनशक्ति परिचालन गरिएको कार्यस्थलमै रहेका इन्जिनियर मुकेशराज साहले जानकारी दिए ।
